मुंबई: बॉलिवूडमध्ये येण्यासाठी अनेक कलाकारांना बराच संघर्ष करावा लागतो. खास करून ज्यांचे बॉलिवूडमध्ये कोणीच गॉडफादर नाहीत अशांना तर यशस्वी होण्यासाठी बरेच कष्ट करावे लागतात. असंच काहीस अभिनेत्री मिनिषा लांबासोबत झालं. मागचा बराच काळ बॉलिवूडपासून दूर असलेली दिल्लीतून मुंबईमध्ये बॉलिवूडमध्ये काम करण्यासाठी आली होती. नुकत्याच दिलेल्या एका मुलाखतीत मिनिषानं तिच्या संघर्षाचा काळाचा अनुभव शेअर केला. यावेळी तिनं सुरुवातीच्या काळात तिला कोणत्या समस्यांना सामोरं जावं लागलं हे सांगितलं.

रेडिओ होस्ट सिद्धार्थ कन्ननला दिलेल्या मुलाखतीत मिनिषा म्हणाली, ‘जेव्हा मी मुंबईला आले होते. तेव्हा माझ्यकडे खूपच कमी पैसे होते. मी एका ठीकाणी पेइंग गेस्ट म्हणून राहत होते. तिथे मला ५ हजार रुपये भाडं द्यावं लागत होतं. त्यावेळी माझ्या घर मालकीणीनं माझ्यावर चोरीचा आरोप केला होता. मी त्यांच्या कपाटातून पैसे चोरी केले असं त्यांचं म्हणणं होतं. मी त्यांना वारंवार समाजावत राहिले की मी चोरी केली नाही पण त्याने काहीच फरक पडला नाही. ज्यानंतर मी दोन दिवसांतच त्यांचं घर सोडून दिलं.’

आपल्या संघर्षाच्या काळाबाबत मिनिषा पुढे म्हणाली, ‘मी त्या घरातून बाहेर पडले त्यावेळी माझ्याकडे जास्त पैसे नव्हते. महागडं घर भाड्यानं घेणं मला परवडणारं नव्हतं. त्यामुळे मी ७ हजार रुपये भाड्यानं एक फ्लॅट घेतला. जी एक मोठी खोली होती. तसं तर त्याला फ्लॅटही म्हणू शकत नाही. कारण तो एकच मोठा रुम होता. पण त्यावेळी इतर काही माझ्या अवाक्याच्या बाहेरचं होतं.’

मॉडेलिंगनंतर मिनिषा लांबानं शूजित सरकारच्या ‘यहां’ चित्रपटातून बॉलिवूड पदार्पण केलं होतं. या चित्रपटातील मिनिषाच्या भूमिकेचं बरंच कौतुकही झालं होतं. त्यानंतर मिनिषानं ‘हनीमून ट्रैवल्स प्राइवेट लिमिटेड’, ‘बचना ऐ हसीनो’, ‘वेलडन अब्बा’ आणि ‘भेजा फ्राई २’ यांसारख्या चित्रपटांमध्ये काम केलं. याशिवाय तिनं ‘छूना है आसमान’, ‘तेनाली रामा’ ‘इंटरनेट वाला लव’ यांसारख्या काही टीव्ही मालिकांमध्येही काम केलं.