मुंबई : छोट्या पडद्यावरील लोकप्रिय अभिनेत्री श्वेता तिवारी सध्या ‘खतरों के खिलाडी’ कार्यक्रमाच्या ११ व्या पर्वाच्या चित्रीकरणात सहभागी झाली आहे. या कार्यक्रमाचे चित्रीकरण दक्षिण आफ्रिकेतील केपटाऊन येथे होत आहे. श्वेता तिथे गेल्यापासून सातत्याने विविध कारणांमुळे चर्चेत आहे. कधी ती पोस्ट करत असलेल्या फोटोंमुळे तर कधी तिच्यात आणि अभिनव कोहलीमध्ये सुरू असलेल्या वादामुळे ती सतत चर्चेत आहे.

श्वेता सोशल मीडियावरही खूपच सक्रीय आहे. ती सातत्याने आपल्या मुलांसोबतचे फोटो शेअर करत असते. अलिकडेच श्वेता तिवारीने तिच्या इन्स्टाग्राम स्टोरीवर मुलगी पलक आणि मुलगा रेयांश सोबतचे दोन फोटो शेअर केले आहेत. हे फोटो शेअर केल्यानंतर श्वेता पुन्हा एकदा चर्चेत आली आहे. श्वेताने फोटो पोस्ट करायच्या आधी अभिनवने इन्स्टाग्रामवर एक व्हिडीओ शेअर करत श्वेतावर आणखी काही आरोप केले आहेत.

पलकने आईसाठी लिहिला खास संदेश

श्वेताने तिच्या मुलांसोबतचा फोटो इन्स्टाग्राम स्टोरीवर शेअर केला. त्यानंतर मुलीने पलकनेदेखील आईसाठी एक खास नोट लिहिली आहे. त्यात पलकने म्हटले आहे की, ‘धन्यवाद. आई तू आमचे ज्या पद्धतीने संगोपन केले आहेस आणि करते आहेस. खरेपणामध्ये किती ताकद असते हे तू स्वतःचं उदाहरण देऊनच आम्हाला पटवून देत आहेस त्यासाठी धन्यवाद. तुझ्या विचारांमुळे नकारात्मक विचार आम्ही कधीच करत नाही, त्यासाठी देखील धन्यवाद… तू माझ्यासाठी सारे काही आहेस. तू जगातील सर्वात उत्तम पालक आहेस, तू आमच्यासोबत आहेस हे आमचे भाग्य आहे…’

अभिनवने केले श्वेतावर नवे आरोप

श्वेता आणि पलक तिवारी यांनी त्यांच्या इन्स्टा स्टोरी पोस्ट केल्या आहेत, त्यावरून सर्वकाही आलबेल आहे असे वाटते आहे. परंतु दुसरीकडे अभिनव कोहली मात्र त्याच्या मुलाला रेयांशला भेटण्यासाठी कमालीचा व्याकूळ झाला आहे. फादर्स डे च्या निमित्ताने त्याने इन्स्टाग्रामवरून एक व्हिडीओ शेअर केला. त्यामध्ये त्याला रेयांशला भेटता येत नसल्याची खंत व्यक्त केली आहे. तसेच रेयांशला भेटण्यासाठी हरएक प्रकारे प्रयत्न केले परंतु ते सर्व निष्फळ ठरल्याचेही त्याने सांगितले. यावेळी त्याने पुन्हा एकदा श्वेतावर आरोप केले आहेत.

मुलाला इथे ठेवून ती आफ्रिकेत मजा करतेय; अभिनव कोहलीची श्वेतावर पुन्हा टीका
अभिनव म्हणाला, ‘आमच्या मुलाला श्वेता एकटी ठेवून दक्षिण आफ्रिकेला निघून गेली. तिथे जाऊन ती मौजमजा करत आहे. इथे माझा मुलगा मात्र आई- वडील असून दीड महिन्यापासून एकटा रहात आहे. या दीड महिन्यात त्याला भेटण्यासाठी प्रयत्न केले परंतु त्यात यश आले नाही. परंतु मी अद्याप हार मानलेली नाही. मी सातत्याने प्रयत्न करतच राहणार आहे.’ अभिनवन पुढे म्हणाला की, ‘महिलांसाठी विशेष कायदे तयार केले आहेत, ही गोष्ट नक्कीच चांगली आहे. परंतु आता पुरुषांसाठी देखील असे काही खास कायदे तयार करण्याची गरज आली आहे. त्यामुळे माझ्या मुलाला भेटण्याचा अधिकार मिळू शकेल. तसेच खोट्या केस दाखल होणे टाळता येऊ शकेल.’

श्वेता तिवारीची मुलगी पलकनं इन्स्टाग्राम अकाउंट केलं डिलीट, आई- वडिलांच्या वादानं घेतला निर्णय?
दरम्यान, श्वेता जेव्हा खतरों के खिलाडी कार्यक्रमाच्या चित्रीकरणाला दक्षिण आफ्रिकेला रवाना झाली तेव्हापासून अभिनव आणि तिच्यामध्ये आरोप प्रत्यारोप होत आहेत. श्वेता मुलाला रेयांशला एकट्याला सोडून निघून गेल्याचा आरोप अभिनवने केला होता. त्यावर श्वेताने प्रत्युत्तर देताना अभिनव मुलाच्या संगोपनासाठी एकही रुपया देत नसल्याचे सांगितले होते. सध्या श्वेता तिवारी तिची मुलगी पलक आणि मुलगा रेयांश यांच्यासोबत वेगळी रहाते आहे. श्वेता आणि अभिनवय यांच्यात त्यांचा मुलगा रेयांशच्या कस्टडीवरून वाद सुरू आहेत.