मुंबई: ‘बिग बॉस १३’पासून प्रसिद्धची झोतात आलेली शहनाझ गिल सोशल मीडियावर नेहमीच चर्चेचा विषय ठरते. बिग बॉसच्या घरात तिची सिद्धार्थ शुक्लासोबतची मैत्री विशेष चर्चेत राहिली होती आणि या जोडीनं प्रेक्षकांचं खूप मनोरंजन केलं होतं. बिग बॉसमधून बाहेर पडल्यानंतर शहनाझ कधी तिच्या म्युझिक व्हिडीओ तर कधी बॉडी ट्रान्सफर्मेशनमुळे चर्चेचा विषय ठरली आहे. पण ट्रोलिंग हे तिच्यासोबत फारसं कधी झालेलं नाही. पण आता एका व्हायरल व्हिडीओमुळे मात्र शहनाझला सोशल मीडियावर जोरदार ट्रोल केलं जात आहे.

सोशल मीडियावर व्हायरल होत असलेल्या या व्हिडीओमध्ये शहनाझचा एक स्टाफ मेंबर तिचे हाय हिल्स सॅन्डल तिच्या पायातून काढताना दिसत आहे. पण तिचं हे वागणं नेटकऱ्यांना मात्र अजिबात रुचलेलं नाही. त्यावरून त्यांनी शहनाझला चांगलंच सुनावलं आहे. शहनाझ सध्या मुंबईमध्ये शूटिंग करत असून ती शूटिंग लोकेशनवरून व्हॅनिटीकडे जात असतानाचा हा व्हिडीओ आहे. या व्हिडीओमध्ये शहनाझ तिच्या व्हॅनिटीकडे जाताना दिसत आहे. एवढ्यात एक व्यक्ती तिचा हात पकडते आणि दुसरा एक स्टाफ मेंबर तिच्या चपला घेऊन येतो आणि तिचे सॅन्डल काढू लागतो. शहनाझ सुद्धा हिल्स काढून चप्पल घालते आणि चालू लागते.

शहनाझचा हा अंदाज नेटकऱ्यांना अजिबात आवडलेला नाही. त्यामुळे नेहमीच सोशल मीडियावर शहनाझचं कौतुक करणाऱ्या युझर्सनी तिला यावरून ट्रोल करायला सुरुवात केली आहे. काहींना शहनाझला स्वतः हील्स न काढण्यावरून सुनावलं तर काहींनी ती आता माज आल्यासारखं वागत असल्याचं म्हटलं आहे.

शहनाझच्या कामाबद्दल बोलायचं तर ती लवकरच दिलजीत दोसांजसोबत ‘हौसला रख’ या चित्रपटात दिसणार आहे. याशिवाय ती अभिनेता सिद्धार्थ शुक्लासोबतही एका प्रोजेक्टमध्ये दिसणार असल्याचं बोललं जात आहे. या दोघांनी एकत्र काही जाहिरातींमध्ये काम केलं आहे. याशिवाय एक म्युझिक व्हिडीओसुद्धा केला होता जो खूप लोकप्रिय ठरला होता.