विक्रोळी पूर्व परिसरात एका इमारतीचे बांधकाम सुरू आहे. या ठिकाणी ही महिला पतीसोबत कामगार म्हणून काम करते. गेल्या शनिवारी (ता. १९) ही महिला काम करत असताना, वरच्या मजल्यावरून एक सळई पडली. ती थेट महिलेच्या छातीत आरपार घुसली. त्यानंतर या महिलेला तत्काळ महापालिकेच्या राजावाडी रुग्णालयात नेण्यात आले. मात्र, तिची प्रकृती गंभीर असल्याने, राजावाडीत प्राथमिक उपचारानंतर या महिलेला सायन येथील लोकमान्य टिळक सर्वोपचार रुग्णालयातील अतिदक्षता विभागत हलवण्यात आले. येथील डॉक्टरांनी तपासणी करून तिच्यावर तत्काळ शस्त्रक्रिया करण्याचा निर्णय घेतला. मात्र, या महिलेच्या छातीत सळई आरपार घुसली असल्याने तिला शस्त्रक्रिया गृहातील ‘बेड’वर झोपवणेही शक्य होत नव्हते. बऱ्याच प्रयत्नानंतर या महिलेस एका कुशीवर झोपवून ही शस्त्रक्रिया करण्यात आली. ही अत्यंत अवघड शस्त्रक्रिया सलग तीन तास सुरू होती.
ही अत्यंत अवघड शस्त्रक्रिया यशस्वीपणे करणाऱ्या १२ जणांच्या चमूमध्ये शल्यक्रिया विभागातील डॉ. विनीत कुमार, डॉ. रणजीत कांबळे, डॉ. पार्थ पटेल, हृदयशस्त्रक्रिया विभागातील डॉ. कुंतल सुराणा, भूलतज्ज्ञ डॉ. तेजस्विनी जांबोटकर यांच्यासह डॉ. अमेय, डॉ. प्राजक्ता आणि परिचारिका तेजस्विनी गायकवाड आणि सहाय्यक भास्कर लहानगे यांचा समावेश होता, अशी माहिती रुग्णालयाचे अधिष्ठाता डॉ. मोहन जोशी यांनी दिली.