घाटकोपरमध्ये दिराने वहिनी आणि ती घरकाम करीत असलेल्या मालकावर ॲसिड फेकल्याची घटना बुधवारी घडली. यात दोघेजण भाजले असून त्यांच्यावर रुग्णालयात उपचार करण्यात आले. घाटकोपर पोलिसांनी गुन्हा दाखल करीत प्रबुद्ध कांबळे (४५) याला अटक केली.
घाटकोपरच्या पारशीवाडीमध्ये राहणाऱ्या प्रबुद्ध कांबळे याचा गेल्या काही महिन्यांपासून याच परिसरातील सोने व्यापारी सुधांशु प्रमानी याच्यासोबत वाद सुरु होता. पैशाच्या गरजेपोटी प्रबुद्ध याची वहिनी या सोने व्यापाऱ्याकडे घरकामाला जाऊ लागली. ते प्रबुद्ध याला पसंत नव्हते. बुधवारी वहिनी सुधांशु याच्याकडे काम करीत असताना प्रबुद्ध त्याच्या घरी पोचला. प्रबुद्ध आणि सुधांशु यांच्यामध्ये जोराचे भांडण झाले. दोघांचे भांडण सोडविण्यासाठी वहिनी मध्यस्थी करू लागली. याचवेळी संतापलेल्या प्रबुद्ध याने शौचालय साफ करण्यासाठी असलेले ॲसिड त्यांच्या अंगावर फेकले.