मुंबई : गेल्या काही दिवसांपासून आमिर खानच्या आगामी ‘लाल सिंह चड्ढा’ सिनेमामुळे चर्चेत आहे. या सिनेमाचे चित्रीकरण लडाखमध्ये सुरू आहे. सेटवरचे काही फोटो सिनेमाद्वारे बॉलिवूडमध्ये पदार्पण करणा-या नागा चैतन्यने शेअर केले होते. हे फोटो खूपच व्हायरल झाले होते. आता पुन्हा एकदा हा लाल सिंह चड्ढा सिनेमची टीम चर्चेत आली आहे.

स्थानिकांनी केला हा आरोप

लाल सिंह चड्ढा सिनेमाची टीम लडाखमधील वाखा गावात चित्रीकरण करत आहे, तिथे त्यांनी खूप कचरा पसरवल्याचा आरोप स्थानिकांनी केला आहे. इतकेच नाही तर सोशल मीडियावर त्यांनी व्हिडीओ देखील शेअर केला आहे. या व्हिडओमध्ये वाखा गावात खूप कचरा झालेला दिसत आहे. या गावात सातत्याने येणा-या गाड्यांमुळे प्रदूषण तर होतेच आहे शिवाय प्लास्टिकच्या बाटल्या, अन्य कचरा इतस्तः फेकलेला दिसत आहे. हा व्हिडीओ एका युझरने ट्विटरवर शेअर केला आहे. हा व्हिडीओ शेअर करत त्याने लिहिले आहे, ‘ बॉलिवूड स्टार अभिनेता आमिर खान त्याच्या आगामी लाल सिंह चड्ढा सिनेमाची टीम लडाखमधील वाखा गावाला ही भेट देऊन निघून गेले आहेत. आमिर खान स्वतः त्याच्या गाजलेल्या सत्यमेव जयते या कार्यक्रमातून पर्यावरणाला स्वच्छ ठेवण्याच्या मोठ्या मोठ्या गोष्टी सांगतात. परंतु जेव्हा स्वतःवर वेळ येते तेव्हा काय करतात ते बघा…’

दरम्यान, काही दिवसांपूर्वी या सिनेमाच्या सेटवरचा एक फोटो अभिनेता नागा चैतन्यने शेअर केला होता. त्या फोटोमध्ये आमिर खान, किरण राव, नागा चैतन्य दिसत आहे. नागा आणि आमिर मिलिट्रीच्या ड्रेसमध्ये दिसत आहेत. आमिर आणि किरणच्या घटस्फोट घेत असल्याचे जाहीर झाल्यानंतर या दोघांचा एकत्रित असा हा पहिलाच फोटो होता.

लाल सिंह चड्ढा हा सिनेमा टॉम हॅक्सचा फॉरेस्ट गम्पवर आधारीत आहे. या सिनेमात आमिर खान आणि करीना कपूर हे मुख्य भूमिकेत आहेत. नागा चैतन्य या सिनेमात बुब्बा ही भूमिका साकारत आहे. लडामध्ये एका युद्धाचे दृश्य चित्रीत करण्यात येत असून हे चित्रीकरण ४५ दिवस चालणार आहे.