काही वर्षांपासून एका किडनीवर जगतेय अभिनेत्री, आता उपचारांसाठी पैसेही नाहीत

मुंबई: करोनाच्या काळात अनेक कलाकारांवर आर्थिक अडचणीचं संकट आहे. पण टीव्ही अभिनेत्री अनन्या सोनी मात्र यावेळी आर्थिक अडचणीसोबतच किडनीच्या आजाराशी लढत आहे. एकाच वेळी वेगवेगळ्या समस्यांचा सामना करत असलेली अनन्या सध्या रुग्णालयात आहे. पण अनन्याची तब्येत एवढी ढासळली आहे की, तिच्याकडे यावर उपचार घेण्यासाठी लागणारे पैसे नाही आहेत. पैशांच्या मदतीसाठी तिनं आपल्या नातेवाईकांना विचारणा केली. अनेक टीव्ही मालिकांमध्ये काम केलेल्या अनन्यानं एक व्हिडीओ शेअर करताना याची माहिती दिली.

अनन्यानं तिच्या इन्स्टाग्रामवर एक व्हिडीओ शेअर केला आहे. ज्यात तिनं त्याच्या तब्येतीबद्दल सांगितलं आहे. मागच्या ६ वर्षांपासून ती एका किडनीवर जगत आहे. या व्हिडीओमध्ये अनन्यानं सांगितलं आहे की, तिच्याकडे यावर उपचार करण्यासाठी पैशांची गरज आहे आणि सध्या तिला आर्थिक अडचणीचा सामना करावा लागत आहे. ज्यामुळे सध्या उपचार करून घेणंही तिच्यासाठी कठीण जात आहे.

अनन्या मागच्या काही दिवसांपासून मुंबईच्या होली स्पीरिट रुग्णालयात आहे. ‘टाइम्स ऑफ इंडिया’शी बोलताना अनन्या म्हणाली, ‘२०१५ पासून मी एका किडनीवर जगत आहे. ६ वर्षांपूर्वीच माझी एक किडनी निकामी झाली होती. त्यावेळी माझ्या वडिलांनी मला त्यांची किडनी दिली. पण आता ती किडनी देखील निकामी झाली आहे. अशात आता मला पुन्हा एकदा किडनी ट्रान्सप्लान्टची गरज आहे.’

अनन्या म्हणाली, ‘मी कधीच विचार केला नव्हता की मला आयुष्यात अशा कोणत्या गोष्टीचा सामना करावा लागेल. पण यापेक्षा त्रासदायक गोष्ट अशी आहे की, माझ्याकडे कोणतीही आर्थिक बचत नाहीये. माझा भाऊ चांगलं काम करत होता. माझ्या आईचा बिझनेसही चांगला चालला होता. पण आमच्या घराला आग लागली आणि सर्व काही संपलं.’ अनन्यानं ‘नामकरण’ ,’इश्क में मरजावां’, ‘क्राइम पेट्रोल’ ‘अदालत’ या मालिकांमध्ये काम केलं आहे.