मुंबई- या महिन्याच्या अखेरीस २६ तारखेपासून ‘जय भवानी जय शिवाजी‘ मालिका प्रेक्षकांच्या भेटीला येणार आहे. या मालिकेची उत्सुकताही चाहत्यांमध्ये स्पष्टपणे दिसते. छत्रपती शिवरायांचं स्वराज्याचं स्वप्न पूर्ण करण्यासाठी ज्या शिलेदारांनी प्राणांची आहुती दिली त्या शिलेदारांच्या शौर्याला ही मालिका समर्पित आहे. सुप्रसिद्ध अभिनेते अजिंक्य देव या मालिकेत बाजीप्रभू देशपांडे यांची भूमिका साकारत असून ही ऐतिहासिक व्यक्तिरेखा साकारण्यासाठी त्यांनी केसांना कात्री लावली.

अभिनयाच्या आजवरच्या कारकिर्दीत पहिल्यांदाच केसांना कात्री लावल्याचं अजिंक्य देव म्हणाले. आपल्या या व्यक्तिरेखेबद्दल बोलताना ते म्हणाले की, ‘एक अभिनेता म्हणून हा निर्णय घेणं माझ्यासाठी थोडं कठीण होतं. प्रेक्षकांना हा लुक आवडेल की नाही याची भीती देखील होती. मात्र माझ्या या नव्या लुकला प्रेक्षकांनी पसंती दिलेली पाहून माझा निर्णय योग्य असल्याचं समाधान आहे. इतिहासावरच्या प्रेमापोटीच हे शक्य झालं आहे. बाजीप्रभू देशपांडेंसारखं भव्यदिव्य व्यक्तिमत्व साकारायचं तर एवढा त्याग करणं गरजेचं होतं असं मला वाटतं.’

विशेष म्हणजे या मालिकेतून अजिंक्य देव छोट्या पडद्यावर पुनरागमन करत आहेत. अजिंक्य देव आपल्या भूमिकेविषयी सांगतात, ‘माझ्या करिअरची सुरुवातच ‘सर्जा’ चित्रपटातील ऐतिहासिक व्यक्तिरेखेने झाली होती. त्यामुळे बाजीप्रभू साकारताना प्रचंड आनंद होत आहे. बाजीप्रभूंच्या शौर्याच्या कथा आपण ऐकल्या आहेत, वाचल्या आहेत. पावनखिंडीमध्ये जीवाची बाजी लावत ते शेवटच्या श्वासापर्यंत लढले. अशा या शुरवीराची भूमिका साकारायला मिळणं हे माझ्यासाठी नवं आव्हान असणार आहे. या भूमिकेसाठीचा लुकही माझ्यासाठी नवा आहे.’

अजिंक्य देव पुढे सांगतात, ‘फिटनेसच्या बाबतीच मी नेहमीच जागरुक असतो. व्यायाम आणि खाण्यावरचं नियंत्रण यामुळेच मी फिट आहे. मी दररोज पाच ते सहा किलोमीटर धावतो. उत्तम आरोग्यासाठी हे सर्व गरजेचं आहे असं मला वाटतं. या सगळ्याचा उपयोग मला ‘जय भवानी जय शिवाजी’ मालिकेत बाजीप्रभू साकारताना होत आहे.’

स्टार प्रवाह प्रस्तुत या मालिकेची निर्मिती दशमी क्रिएशन्सची आहे. २६ जुलैपासून रात्री १० वाजता छत्रपती शिवरायांच्या शिलेदारांची अंगावर काटे आणणाऱ्या घटना प्रेक्षकांच्या भेटीला येणार आहेत.