मुंबई : अभिनेत्री करिना कपूर खान हिने लिहिलेले एक पुस्तक नुकतेच प्रकाशित झाले आहे. करिनाने लिहिलेल्या या पुस्तकावरून तिचे चाहते आणि मित्रमंडळी तिचे एकीकडे कौतुक करत आहेत तर दुसरीकडे करिनावर काही लोक प्रचंड संतापले आहेत. इतकेच नाही तर तिच्याविरोधात कायदेशीर कारवाई करण्याचा इशार त्यांनी दिला आहे. ऑल इंडिया मायनॉरिटी बोर्डने करिनाच्या या पुस्तकाच्या नावावर आक्षेप नोंदवला आहे.

करिनाने लिहिलेल्या या पुस्तकाचे नाव आहे, ‘करिना कपूर खान प्रेग्नेंसी बायबल.’ करिनाच्या या पुस्तकाविरोधात ऑल इंडिया मायनॉरिटी बोर्डाने तक्रार दाखल करण्याचा निर्णय घेतला असल्याचे बोर्डचे अध्यक्ष डायमंड युसुफ यांनी सांगितले आहे.

करिना कपूरच्या पुस्तकाला विरोध

ऑल इंडिया मायनॉरिटी बोर्डाची कानपूरमधील चुन्नीगंज येथे बैठक झाली. या बैठकीत अनेक नागरिकही सहभागी झाले होते. यावेळी करिना कपूरने लिहिलेल्या या पुस्तकाच्या नावामध्ये बायबल हा उल्लेख केल्याबद्दल एकमताने निषेध करण्यात आला. तसेच तिच्याविरोधात कायदेशीर कारवाई करण्याचाही निर्णय घेण्यात आला. अर्थात त्याआधी तिच्याविरोधात कोणत्या कायद्याअंतर्गंत कारवाई करता येईल याबाबत कायदेशीर सल्ला घेतला जाणार आहे. दरम्यान, याप्रकरणी निर्माण झालेल्या वादाबाबत करिनाने कोणतेही निवेदन जारी केलेले नाही.

दरम्यान, या वर्षाच्या प्रारंभी करिनाने दुसऱ्या मुलाला ‘जेह’ला जन्म दिला होता. जेहच्या जन्मानंतर करिनाने तिच्या दोन्ही प्रेग्नंन्सीच्या काळातील अनुभव या पुस्तकात लिहिले. हे पुस्तक प्रकाशित होत असल्याची बातमी देखील करिनाने सोशल मीडियावरून दिली होती. हे पुस्तक म्हणजे माझे तिसरे अपत्य असल्याचेही करिनाने नमूद केले होते. पुस्तक प्रकाशित झाल्यानंतर बेस्ट सेलर्सच्या यादीमध्ये समाविष्ट झाले आहे.

करिना कपूरने तिच्या सोशल मिडिया अकाउंटवर पुस्तकाबद्दल लिहिताने म्हटले की, ‘हा माझा प्रवास आहे. माझ्या दोन्ही प्रेग्नेंसी आणि माझे पुस्तक प्रेग्नेंसी बायबल. मी प्रेग्नंट असताना कधी काम करण्यासाठी उत्सुक असायचे तर कधी बेडवरून उठणेही कठीण असायचे. हे पुस्तक माझ्यासाठी खूप महत्त्वाचे आहे. कारण यामध्ये दोन्ही प्रेग्नेंसीच्या कालावधीत माझ्यात झालेले शारीरिक आणि मानसिक बदलांबद्दल यात लिहिले आहे. त्यामुळेच हे पुस्तक म्हणजे माझे तिसरे बाळच आहे.’