म. टा. खास प्रतिनिधी, मुंबईः चार दिवसांपूर्वी कफ परेडमध्ये हत्या करण्यात आलेल्या तीन महिन्यांच्या बालिकेवर हत्येपूर्वी लैंगिक अत्याचार करण्यात आल्याची धक्कादायक बाब उघडकीस आली आहे. कफ परेड पोलिसांनी याप्रकरणी एक तृतीयपंथी आणि त्याच्या साथीदार मित्राला अटक केली आहे.

कफ परेडमध्ये राहणाऱ्या बालिकेच्या पालकांकडे तृतीयपंथी प्रथेनुसार पैसे, साडी आणि नारळ मागण्यास गेला. मुलीच्या बारश्याच्या वेळी हे सर्व मानपानासह देतो, असे मुलीच्या कुटुंबीयांनी सांगितले. मात्र त्याला लगेचच पैसे हवे होते. यावरून बालिकेच्या कुटुंबीयांसोबत त्याने भांडण केले आणि त्याचा राग बालिकेवर काढला. पहाटेच्या सुमारास बालिकेचे अपहरण करून जवळच असलेल्या खाडीच्या दलदलीत तिला जिवंत फेकून दिले. हा प्रकार उघडकीस येताच पोलिसांनी तृतीयपंथी कन्हैया चौगुले आणि त्याचा साथीदार सोनू काळे या दोघांना अटक करून बालिकेचा मृतदेह रुग्णालयात शवविच्छेदनासाठी पाठविला. शवविच्छेदनाचा अहवाल पोलिसांना मिळाला असून यामध्ये बुडाल्याने तिचा मृत्यू झाल्याचे म्हटले आहे. इतकेच नाही तर हत्येपूर्वी तिच्यावर लैंगिक अत्याचार झाल्याचेही अहवालात नमूद करण्यात आले आहे. या अहवालावरून पोलिसांनी गुन्ह्यातील कलमांमध्ये वाढ केली आहे.

दरम्यान, बालिकेच्या घरच्यांनी कन्हैया हा तृतीयपंथीय नसून पुरुष असल्याचा आरोप केला आहे. पोलिसांनी याबाबत त्याच्या वडिलांना विचारले असता त्यांनीही तो पुरुषच असून गेल्या काही वर्षांपासून तृतीयपंथींच्या सहवासात राहत आहे. पैसे कमवायचा सोपा मार्ग म्हणून तो तृतीयपंथी बनल्याचे म्हटले जात आहे. गुन्हा दाखल करताना तो तृतीयपंथी आहे असे नमूद करण्यात आले आहे. मात्र याबाबतही वैद्यकीय सल्ला घेऊन पुढील कारवाई केली जाणार असल्याचे पोलिसांनी म्हटले आहे.