मुंबई: अभिनेता जावेद जाफरी यांचा मुलगा मिजान जाफरी सध्या त्याचा आगामी चित्रपट ‘हंगामा २‘मुळे चर्चेत आहे. मिजान या चित्रपटात अभिनेत्री शिल्पा शेट्टीसोबत स्क्रीन शेअर करणार आहे. पण दुसरीकडे तो अमिताभ बच्चन यांची नात नव्या नवेली नंदा नवेली हिला डेट करत असल्याच्या वृत्तांमुळे चर्चेत आहे. हे दोघंही एकमेकांना डेट करत असल्याच्या चर्चा होत असताना आता नुकत्याच दिलेल्या एका मुलाखतीत मिजाननं नव्यासोबतच्या नात्यावर मौन सोडलं आहे.

एका हिंदी वेबसाइटला दिलेल्या मुलाखतीत मिजान म्हणाला, ‘मी शपथ घेऊन सांगतो, मी सिंगल आहे. मी या आधीही अनेकदा यावर बोललो आहे की, या सर्व केवळ अफवा आहेत. मी आता या सर्व चर्चांवर पूर्णविराम लावू इच्छितो त्यासाठी अखेरचं सांगतोय यावर खूप हंगामा आधीच झालेला आहे आणि आता मला स्वतःलाच या मुद्द्यापासून दूर राहायचंय.’

मिजान यावर बोलताना पुढे म्हणाला, ‘हा नव्यावर अन्याय होत आहे. मला वाटतं जी व्यक्ती या इंडस्ट्रीचा भागच नाहीये तिच्याबद्दल असं काही बोलणं चुकीचं आहे. मी आणि नव्यामध्ये असं कोणतंच नातं नाहीये. ना आमच्या दोघांमध्ये कोणतीही विचित्र गोष्ट आहे. आम्ही चांगले मित्र आहोत आणि या पलिकडे मला या विषयावर काहीच बोलायचं नाही आहे.’

मिजान जाफरीनं २०१९ मध्ये रिलीज झालेल्या ‘मलाल’ चित्रपटातून बॉलिवूडमध्ये पदार्पण केलं होतं. या चित्रपटात त्याच्यासोबत शर्मिन सहगलची मुख्य भूमिका होती. या चित्रपटाची निर्मिती संजय लीला भन्साळी यांनी केली होती. लवकरच मिजान ‘हंगामा २’ या चित्रपटातून प्रेक्षकांच्या भेटीला येणार आहे. ज्याचं दिग्दर्शन प्रियदर्शन यांनी केलं आहे. या चित्रपटातून अभिनेत्री शिल्पा शेट्टी बॉलिवूडमध्ये कमबॅक करत आहे. याशिवाय या चित्रपटात परेश रावल, राजपाल यादव, आशुतोष राणा, प्रणिता सुभाष यांच्या महत्त्वपूर्ण भूमिका आहेत. हा चित्रपट येत्या २३ जुलैला ओटीटी प्लॅटफॉर्मवर रिलीज होणार आहे.