मुंबई: मराठी मालिका विश्वात अनेक नवीन मालिकांची घोषणा झाली आहे. यात रिअॅलिटी शोजचा देखील समावेळ आहे. सर्वात जास्त चर्चा सुरू आहे ती, म्हणजे बिग बॉस मराठीच्या तिसऱ्या पर्वाची.

पहिल्या पर्वात मेघा धाडेनं तर दुसऱ्या पर्वात शिव ठाकरे यांनी विजेते पद पटकावलं होतं. त्यामुळं यंदा या बिग बॉसच्या घरात कोण कोण पाहायला मिळणार याबद्दल प्रेक्षकांमध्ये उत्सुकता दिसून येत आहे. सोशल मीडियावर अनेक सेलिब्रिटींच्या नावांची चर्चा पाहायला मिळत आहे. या यादीत आता अभिनेत्री दीप्ती देवी हिच्या नावाचा समावेश आहे.

कोण आहे दीप्ती देवी?
दीप्तीचा जन्म पुण्याचा आहे. ती मूळ गुजराती आहे. ‘अवघाचि संसार’ या मालिकेतून ती घराघरांत पोहोचली .
त्यानंतर तिने अनेक हिंदी, मराठी मालिकांमध्ये अभिनय केला. ‘मला सासू हवी’ या मालिकेत तिनं मध्यवर्ती भूमिका साकारली होती. या मालिकेमुळ ती पुन्हा प्रकाशझोतात आली होती. आता बिग बॉसच्या निमित्तानं पुन्हा एकदा तिच्या नावाची चर्चा सुरू आहे.

तसंच सूत्रांकडून मिळालेल्या माहितीनुसार नेहा जोशी आणि संग्राम समेळ ही दोन नावं पुढं आली आहेत. चॅनलच्या टीमकडून संग्रामला शोमध्ये सहभागी होण्यासाठी कॉल करण्यात आला असल्याची माहिती मिळाली आहे. त्यामुळं खरंच हे दोन्ही कलाकार बिग बॉस मराठीच्या घरात दिसतील का? हे पाहणं औत्सुक्याचं ठरेल. त्याचसोबत संग्रामची पहिली पत्नी अभिनेत्री पल्लवी पाटील हीदेखील या नव्या सीझनमध्ये स्पर्धक असण्याची शक्यता वर्तवण्यात येत आहे.

२०२० साली करोनामुळे ‘बिग बॉस मराठी‘चा तिसरा सीझन लांबणीवर गेला होता. परंतु हाच तिसरा सीझन जुलै महिन्याच्या अखेरीस प्रेक्षकांच्या भेटीला येणार असल्याचं सूत्रांकडून कळलं आहे.