मुंबई– चित्रपट, मालिका किंवा नाटकांत काम करण्याची हौस अनेकांच्या मनात असते. मोठ्या पडद्यावर दिसण्याचं स्वप्न घेऊन अनेक नवखे चेहरे काम मिळवण्यासाठी चित्रपटसृष्टीत येतात. स्पर्धेत टिकून परिस्थितीशी झगडून यशस्वी होण्याची जिद्द या कलाकारांमध्ये असते. परंतु, मनोरंजनसृष्टीचा कोणताही अनुभव नसलेल्या या कलाकारांची अनेकदा फसवणूक झाल्याचं उघड होतं. चित्रपटात काम देऊ असं सांगत त्यांच्याकडून पैसे उकळले जातात. अशाच एका सक्रिय टोळीविषयी अभिनेत्री चिन्मयी सुमित यांनी सोशल मीडियावर माहिती दिली आहे.

नेमकं काय आहे ‘सिनेमॅटोग्राफ विधेयक २०२१’? दिग्गजाकडूनही होतोय विरोध

नव्या कलाकारांना काम देण्याच्या बहाण्याने पैसे उकळणाऱ्या काही टोळ्या सध्या चित्रपटसृष्टीमध्ये सक्रिय झाल्या आहेत. चिन्मयीने फेसबुक पोस्टद्वारे अशाच काही व्यक्तींबद्दल माहिती दिली आहे. चिन्मयीने दिलेल्या माहितीनुसार, सध्या छोट्या पडद्यावर अत्यंत गाजणारी मालिका ‘वागळे की दुनिया‘ मध्ये काम देण्याच्या बहाण्याने नवीन कलाकारांकडून पैसे उकळण्याचं काम सुरू आहे. मालिकेच्या नावाखाली या कलाकारांची फसवणूक करण्यात येत आहे. डॅनी जोसेफ आणि प्रिसीला मॅम अशी या व्यक्तींची नावं असून हे दोघेही मालिकेत काम देतो, असं सांगत त्याबदल्यात पैसे देण्याचं आश्वासन देतात आणि कलाकारांची फसवणूक करतात. असाच अनुभव सांगली व त्या भागाकडील काही कलाकारांना आला आहे.

चिन्मयीने ही बाब इतरांच्या लक्षात आणून देत सगळ्यांना सावध राहण्याचा सल्ला दिला आहे. छोट्या- छोट्या गावातून येणाऱ्या नवख्या कलाकारांना चित्रपटसृष्टीबद्दल कोणतीही माहिती नसल्याने ते या टोळीच्या बोलण्याला फसतात. ‘वागळे की दुनिया’ मालिकेत अशा प्रकारे कलाकारांची निवड होत नसल्याचं सांगत चिन्मयीने कोणाच्याही फोनची शहानिशा न करता त्यावर विश्वास न ठेवण्याचं आवाहन केलं आहे.

संजय दत्तच्या पत्नीसोबत लिव्ह- इनमध्ये होता लिअँडर पेस