मुंबईत सार्वजनिक ठिकाणी नागरिकांकडून होणारी अस्वच्छता रोखण्यासाठी क्लीनअप मार्शल नेमण्यात आले आहेत. थुंकणे, अस्वच्छता करणे, मास्क न लावणे यासह विविध प्रकारच्या बाबींवर मार्शलना कारवाई करण्याचे अधिकार देण्यात आले आहेत. गेल्या काही दिवसांत काही भागात क्लीनअप मार्शलनी प्रसारमाध्यम प्रतिनिधी व नागरिकांशी गैरवर्तणूक केल्याच्या तक्रारी पालिकेकडे करण्यात आल्या आहेत. याची गंभीर दखल घेत मुंबईच्या महापौरांनी घनकचरा खात्याचे संबंधित वरिष्ठ अधिकारी आणि क्लीनअप मार्शल एजन्सी यांची शनिवारी एक बैठक घेतली.
क्लीनअप मार्शलच्या गैरवर्तणुकीवर कायमस्वरूपी तोडगा काढण्यासाठी महापौरांनी काही महत्त्वपूर्ण निर्देश या बैठकीत दिले. क्लीनअप मार्शल सेवेत असताना गणवेशाची सक्तीचा असावी, गणवेशावरील कोटवर संबंधित क्लीनअप मार्शलची ओळख दर्शविणारा क्रमांक, पालिकेच्या संबंधित विभागाचे नाव, संबंधित क्लीनअप मार्शलचे नाव तसेच, क्लीनअप मार्शल परिधान करीत असलेल्या कोटच्या समोरील आणि मागील बाजूस कंत्राटदार एजन्सीची माहिती ठळक अक्षरात वाचता येईल या पद्धतीने दर्शविणारी असली पाहिजे, असे महापौरांनी सांगितले.
बोगस मार्शल शोधणे सोपे
मुंबईत ८० टक्के क्लीनअप मार्शल प्रामाणिकपणे काम करतात. दहा ते वीस टक्के मार्शल गैरवर्तन तसेच कामात कुचराई करतात. त्यामुळे सगळे मार्शल बदनाम होत आहेत. गणवेश सक्तीमुळे क्लीनअप मार्शलची ठळक ओळख सर्वांना समजेल. तसेच, बोगस क्लीनअप मार्शल काम करीत असेल तर त्यांचा शोध घेणे सुलभ होईल. कोट तयार करून पुढील आठवड्यात सादर करावा, यावर अंतिम निर्णय घेऊन हा कोट संपूर्ण मुंबईतील क्लीनअप मार्शलना लागू करता येईल, पालिकेच्या कायद्यानुसार करण्यात येणारी दंडात्मक कारवाई करण्यात कुचराई केल्यास मार्शल व त्याच्या एजन्सीवर कारवाई करावी, असे निर्देश महापौरांनी दिले आहेत.