मुंबई: मराठी सिनेमांप्रमाणे वेबविश्वातही स्वप्निल जोशीनं त्याचं अभिनयाचं नाणं खणखणीत वाजवलंय. पहिल्या सीझनला जो प्रतिसाद मिळाला तसंच ‘समांतर २’बद्दलही घडलंय. दुसऱ्या सीझनलासुद्धा प्रेक्षकांकडून भरभरून प्रतिसाद मिळत असून आतापर्यंत ५६ दशलक्ष प्रेक्षकसंख्या या वेब सीरिजला प्राप्त झाली आहे.

नितीश भारद्वाज, स्वप्निल जोशी, तेजस्विनी पंडित आणि सई ताम्हणकर यांसारख्या प्रतिभावान कलाकारांच्या अभिनयाचं कौतुक होताना दिसतंय. ‘समांतर २ ला भरभरून यश मिळणार याबाबत आम्हाला खात्री होती, कारण यातील सर्वच गोष्टी अचूकपणे जुळून आल्या आहेत.

दुसऱ्या भागाला जो प्रतिसाद मिळतोय, त्यानं मला खूप आनंद झाला आहे. मी माझ्या करिअरमध्ये करत असलेल्या नवनवीन प्रयोगांना प्रेक्षकांकडून चांगला प्रतिसाद लाभतोय, याचा आनंद आहे. या सर्व यशाचं श्रेय खासकरून निर्माते अर्जुन आणि कार्तिक यांना तसंच दिग्दर्शक समीर विद्वांस यांना आहे. त्यांनी सर्जनशीलतेच्या बाबतीत घेतलेले श्रम आणि चित्रीकरणाच्या बाबतीत सांभाळलेला दर्जा याला तोड नाही.’ असं स्वप्निल सांगतो.