मुंबई: करोना व्हायरसनं जगभरात थैमान घातलं आहे. देशात करोनाचे रुग्ण वाढतच आहेत. करोनाचा प्रादुर्भाव रोखण्यासाठी लॉकडाऊन, कडक निर्बंध लागू करण्यात आले आहेत. यामुळं अनेक व्यवसाय बंद पडले आहेत. तसंच, फिल्म आणि टीव्ही इंटस्ट्रीलाही फटका बसला आहे.

लॉकडाउनमुळे अनेक महिने बंद राहिलेल्या मनोरंजनसृष्टीच्या अर्थकारणावरही जबर परिणाम झाला आहे. मालिकांच्या बजेटमध्ये जवळपास ३० टक्के कपात करुन काम करण्याच्या सूचना वाहिन्यांनी दिल्या आहेत. त्यामुळे मुख्य कलाकारांपासून इतर कलाकार-तंत्रज्ञांपर्यंत सर्वांच्याच मानधनात घसघशीत कपात करण्यात आली आहे. याचाच फटका कॉमेडी क्विन भारती सिंग हिला बसला आहे. तिच्या मानधनात तब्बल ७० टक्के कपात करण्यात आली आहे म्हटलं जातंय.

मिळालेल्या माहितीनुसार ‘डान्स दिवाने’ या शोमध्ये भारती दिसत असली तरी तिच्या मानधनात तब्बल ७० टक्के कपात करण्यात आली आहे. तर ‘द कपिल शर्मा शो’ च्या निर्मात्यांनीही तिचं ५० टक्के मानधन कमी केलं आहे.

पैसे कापले जातायत, वाईट तर वाटणारंच
मानधनात कपात झाल्यानंतर भारतीनं प्रतिक्रिया दिली आहे. ‘मानधन कमी होणार असल्याचं समजल्यावर सर्वांनाच धक्का बसला आहे. मलाही वाईट वाटतंय. मी निर्मात्यांशी मानधन कपातीवर बोलले आहे. पण जेव्हा लक्षात आलं की, आता परिस्थिती पूर्ण बदलली आहे. अनेक शोज बंद झाले आहेत. जे शोज सुरू आहेत, त्यांना स्पॉन्सर मिळत नाहीएत. त्यामुळं सर्वांनीच ही परिस्थिती समजून घ्यायला हवी, असं मला वाटत’. असं भारती म्हणाली.