मुंबई- तारक मेहता का उल्टा चश्मा मालिकेत मास्टर भिडे ही भूमिका साकारणारा अभिनेता मंदार चांदवडकर यांना कोण ओळखत नाही. मंदार यांनी अनेक मलाठी मालिका, नाटकांमध्ये काम केलं आहे. उत्कृष्ट अभिनयासाठी त्यांना अनेक पुरस्कारही मिळाले आहेत. टीव्हीसृष्टीतील प्रसिद्ध कलाकारांमध्ये त्यांच्या नावाचा उल्लेख आवर्जुन केला जातो. असं जरी असलं तरी त्यांना प्रसिद्धी तारक मेहता या मालिकेतील आत्माराम भिडे या व्यक्तिरेखेने मिळवून दिली. आदही अनेक लोक त्यांना त्यांच्या मूळ नावाने कमी आणि भिडे या नावानेच जास्त ओळखतात.

१२ वर्षांहून अधिक काळ ही मालिका प्रेक्षकांचं मनोरंजन करत आहे. आजही यातलं प्रत्येक पात्र तेवढंच प्रसिद्ध आहे जेवढं ते १२ वर्षांपूर्वी होतं. प्रत्येक पात्राची स्वतःची अशी ओळख आहे आणि त्यांचा वेगळा चाहता वर्ग आहे. आज मंदार चांदवडकर त्यांचा ४५ वा वाढदिवस साजरा करत आहेत. त्यांच्या वाढदिवसानिमित्त आत्माराम भिडे या पात्राशी संबंधित काही रंजक गोष्टी जाणून घेऊ..

शेजार्‍यांना त्याचं मूळ नाव माहीत नाही

भिडे हे पात्र इतके लोकप्रिय झाले आहे की मंदार यांचे शेजारीही त्यांना खऱ्या नावाने ओळखत नाहीत. त्यांचे शेजारीसुद्धा त्यांना भिडे नावानेच हाक मारतात. लोक आत्माराम भिडे या पात्राप्रमाणेच त्यांचा स्वभाव गंभीर मानतात. भिडे हे पात्र आता मंदार यांची ओळखच बनून गेलं आहे.

भिडे यांच्या नावावर वीज बिल येते

लोकांनी भिडे यांचे पात्र इतके गांभीर्याने घ्यायला सुरूवात केली की त्यांच्या घराचे वीज बिलदेखील मास्टर भिडे याच नावावर येते. कोणीही त्यांचा पत्ता खर्‍या नावाने सांगू शकत नाही. लोक त्यांना सतत गोकुळधाम सोसायटीबद्दल विचारत असतात.

कोट्यवधींचे आहेत मालक

मंदार यांच्याकडे जवळपास २० कोटींची मालमत्ता आहे. ते या मालिकेतील एका एपिसोडसाठी साधारणपणे ४५ हजार रुपये घेतात. मंदार यांनाही महागड्या गाड्यांची आवड आहे. जेव्हापासून मंदार यांनी या कार्यक्रमात काम करायला सुरू केलं त्यानंतर त्यांनी मागे वळून पाहिलं नाही.

दुबईमध्ये काम करायचे

मंदार चांदवडकर आधी दुबईमध्ये मेकॅनिकल इंजिनियर म्हणून काम करायचे. २००० मध्ये त्यांनी नोकरी सोडली. त्यानंतर त्यांनी नाटक आणि मालिकांमध्ये काम करण्यास सुरुवात केली. आठ वर्ष मराठी नाटकांमध्ये काम केल्यानंतर आत्माराम भिडे ही व्यक्तिरेखा त्यांनी साकारली.