: बनावट निर्यात प्रोत्साहन देयके मिळविणाऱ्या टोळीच्या करामती महसूल गुप्तचर संचालनालयाने () उजेडात आणल्या आहेत. हा १८०० कोटी रुपयांचा घोटाळा असून, त्याचे लागेबांधे मुंबईसह दिल्ली व सूरत शहरांशीही असल्याचे समोर आले आहे. या प्रकरणी डीआरआयने केलेल्या तपासानुसार, राजन सारंग व प्रशांत मोडक, या दोन उद्योजकांना डीआरआयने अटक केली.
सारंग आणि मोडक हे दोघेही १२४ बनावट कंपन्यांच्या माध्यमातून निर्यात प्रोत्साहन भत्त्याची चोरी करीत होते. या कंपन्यांना निर्यात केल्याचे दाखवून त्याची खोटी देयके सरकारकडे जमा करीत होते. त्याआधारे निर्यात भत्ता मिळवत असत. डीआरआयला याबाबत माहिती मिळाल्यानंतर पथकाने सारंग याच्या घरावर छापा टाकला.
या छाप्यावेळी, ४२.९० कोटी रुपयांची बनावट देयके या दोघांनी प्रशासनकडे पाठवली होती, असे दिसून आले. तसेच २२ कोटी रुपयांची देयके तयार होत होती. त्याआधारे या दोघांना ताब्यात घेण्यात आले. तपासावेळी एक बेकायदेशीर पिस्तुलदेखील डीआरआयने ताब्यात घेतले. हा संपूर्ण घोटाळा १८०० कोटी रुपयांचा असून, ही एक टोळी आहे. टोळीतील अन्य सदस्य दिल्ली व सूरत या शहरांमध्ये असल्याचे डीआरआयमधील सूत्रांनी सांगितले.