हायलाइट्स:
- अँटिलिया स्फोटकांप्रकरणी आणखी दोन जण अटकेत.
- विशेष कोर्टाने दिली २१ जूनपर्यंत एनआयए कोठडी.
- आतापर्यंत सचिन वाझे यांच्यासह सात जणांना अटक.
वाचा: उल्हासनगरमधील ‘मोहिनी पॅलेस’च्या विकासकावर गुन्हा
संतोष शेलार आणि आनंद जाधव अशी अटक करण्यात आलेल्या दोन जणांची नावे असून त्यांना ११ जून रोजी मालाड येथून ताब्यात घेण्यात आले होते. दोघांचीही कसून चौकशी सुरू आहे, असे एनआयएच्या एका अधिकाऱ्याने आज सांगितले. शेलार आणि जाधव या दोघांना आज विशेष न्यायालयात हजर करण्यात आले असता दोघांचीही २१ जूनपर्यंत एनआयए कोठडीत रवानगी करण्यात आली आहे. मुकेश अंबानी यांच्या घराबाहेर स्फोटकांसह जी स्कॉर्पिओ कार पार्क करण्यात आली होती त्या कटात सहभाग असल्याचे काही पुरावे हाती लागल्याने संतोष शेलार आणि आनंद जाधव यांना अटक करण्यात आली आहे. या दोघांचा ठाणे येथील व्यापारी मनसुख हिरन याच्या हत्येतही सहभाग होता का, याचाही तपास एनआयएकडून करण्यात येणार आहे.
वाचा: गजा मारणे सेलिब्रिटी आहे का?; सुटकेच्या अर्जावर हायकोर्टाचा संतप्त सवाल
दरम्यान, मुकेश अंबानी यांच्या अँटिलिया निवासस्थानाबाहेरील रस्त्यावर २५ फेब्रुवारी रोजी संशयास्पदरित्या स्कॉर्पिओ कार पार्क करण्यात आली होती. या कारमध्ये जिलेटिनच्या कांड्या व धमकीपत्र आढळलं होतं. या प्रकरणाचा तपास सुरू असतानाच कारचा मालक मनसुख हिरन याचा मृतदेह मुंब्रा रेतीबंदर येथे खाडीत आढळला होता. त्यानंतर या प्रकरणात मुंबई क्राइम ब्रांचमधील सहायक पोलीस निरीक्षक सचिन वाझे यांचे नाव समोर आल्याने खळबळ उडाली होती. या संपूर्ण प्रकरणाचा तपास एनआयएकडे गेल्यानंतर सचिन वाझे यांच्यासह तीन पोलीस अधिकारी आणि एका कॉन्स्टेबलला तसेच एका क्रिकेट सट्टेबाजाला अटक करण्यात आली आहे. अटकेतील तिन्ही अधिकाऱ्यांना सेवेतून बडतर्फ करण्यात आले आहे. त्यानंतर आता याप्रकरणी आणखी दोन जणांना अटक झाल्याने अधिक धागेदोरे एनआयएच्या हाती येण्याची शक्यता आहे.
वाचा: भिवंडी: बोलण्याच्या लकबीवरून ‘त्या’ हत्येतील आरोपी गजांआड