मुंबई : ‘बिग बॉस १५‘ कार्यक्रमाची तयारी सुरू आहे. यावेळी बिग बॉसच्या घरात कोणते कलाकार सहभागी होणार आहेत, याची उत्सुकता प्रेक्षकांना आहे. बिग बॉसच्या या पर्वाचे वैशिष्ट्य म्हणजे यामध्ये कलाकारांसोबत सर्वसामान्य लोकही सहभागी होणार आहेत. कार्यक्रमात जे कलाकार सहभागी होणार आहेत, त्यामध्ये अंकिता लोखंडे आणि रिया चक्रवर्ती यांच्या नावाची जोरदार चर्चा सुरू आहे. त्यामुळे सर्वांनाच उत्सुकता लागली आहे. कार्यक्रमातील सहभागाबद्दल होणाऱ्या चर्चांवर अंकिताने तिच्या इन्स्टाग्रामवर एक पोस्ट शेअर केली आहे.

ड्रग्सचं व्यसन ते बॉलिवूड सोडण्याची इच्छा, सुशांतच्या निधनानंतर रियानं केलेत धक्कादायक खुलासे
काय लिहिले आहे अंकितानेगेल्या काही दिवसांपासून अंकिता लोखंडे ‘बिग बॉस १५’ कार्यक्रमात सहभागी होणार असल्याची जोरदार चर्चा सुरू होती. या चर्चांवर अंकिताने तिची प्रतिक्रिया सोशल मीडियावरून व्यक्त केली आहे. तिने लिहिले, ‘बिग बॉस’ च्या १५ व्या पर्वामध्ये मी सहभागी होणार असल्याच्या बातम्या अनेक मीडिया रिपोर्टमध्ये प्रसिद्ध झाल्या आहेत. या सर्व बातम्या खोट्या आणि बिनबुडाच्या आहेत. मी बिग बॉस कार्यक्रमात सहभागी होणार नाही, हे सगळ्यांनी लक्षात घ्यावे. मी बिग बॉसमध्ये सहभागी होण्याच्या बातम्या आल्यानंतर मला सातत्याने द्वेषपूर्ण मेसेज अनेकजण पाठवत आहेत. त्यांनी प्रतिक्रिया देण्यास खूपच घाई केली असे मला वाटते. बिग बॉसमध्ये सहभागी होण्याबाबतच्या ज्या बातम्या प्रसिद्ध झाल्या आहेत, त्या संपूर्ण खोट्या आहेत. त्यावर विश्वास ठेवू नका.’

गेल्या काही दिवसांपासून ‘बिग बॉस १५’मध्ये अभिनेत्री रिया चक्रवर्ती आणि अंकिता लोखंडे सहभागी होणार असल्याच्या चर्चा रंगत होत्या. यामुळे सोशल मीडियावरून अनेक युझर्सनी अंकितावर टीका केली होती. अंकिता केवळ प्रसिद्धीसाठी आता ‘बिग बॉस’मध्ये सहभागी होऊन सुशांतसिंह राजपूतच्या आत्महत्येच्या मुद्दयावर लोकांचा सपोर्ट मिळवणार अशा चर्चा होत होती. मात्र आता अंकिताने तिची प्रतिक्रिया व्यक्त केल्याने या चर्चांना पूर्णविराम मिळाला आहे.

सारा अली खाननं रियाला ऑफर केला होता गांजा आणि वोडका? वाचा काय आहे सत्य
सहा महिने चालणार बिग बॉस १५

दरम्यान, बिग बॉसचे १५ वे पर्व ऑक्टोबरमध्ये सुरू होणार आहे. यंदा हे पर्व तीन महिन्यांऐवजी सहा महिने चालणार आहे. त्याचबरोबर कलाकारांसोबत सर्वसामान्य लोकांनाही बिग बॉसच्या घरामध्ये प्रवेश दिला जाणार आहे. दरम्यान, अंकिताच्या कामाबद्दल सांगायचे तर निर्माती एकता कपूरसोबत सध्या ‘पवित्र रिश्ता’ या लोकप्रिय मालिकेच्या दुसऱ्या पर्वामध्ये काम करतेय. या कार्यक्रमाचे स्क्रीप्ट जवळपास तयार आहे. हा कार्यक्रम ओटीटीवर प्रसारित होणार आहे.