मुंबई : छोट्या पडद्यावर अतिशय आवडीने जशा कौटुंबिक मालिका पाहिल्या जातात, त्यावर चर्चा देखील होतात. त्याहीपेक्षा जास्त आवडीने ‘बिग बॉस’ हा कार्यक्रम पाहिला जातो. या कार्यक्रमातील स्पर्धकांचे वागणे, बोलणे, एकमेकांवर ते करत असलेली कुरघोडी, कोण बरोबर कोण चूक यावर प्रेक्षकही तावातावाने चर्चा करत असतात. त्यामुळे बिग बॉस मराठी कार्यक्रम कधी सुरू होतो, याची उत्सुकता प्रेक्षकांना असते. प्रेक्षकांची ही उत्सुकता आता लवकरच संपणार आहे. कारण बिग बॉस हिंदी पाठोपाठ आता बिग बॉस मराठीच्या तिसऱ्या पर्वाचीही घोषणा करण्यात आली आहे.

कलर्स मराठीच्या इन्स्टाग्राम अकाउंटवर बिग बॉस मराठी ३ लवकरच प्रेक्षकांच्या भेटीला येणार असल्याचे सांगत व्हिडीओ देखील शेअर केला आहे. हा व्हिडीओ शेअर करताना लिहिले की, ‘दार परत उघडणार आणि एकच आवाज घुमणार, कारण येतोय बिग बॉस ३. लवकरच कलर्स मराठीवर…’ त्यामुळे आता हा कार्यक्रम लवकरच सुरू होणार हे नक्की झाले आहे.

अनेकदा वादग्रस्त ठरूनही, त्यावर टीका होऊनही तितक्याच आवडीने बिग बॉस हा कार्यक्रम पाहिला जातो. ‘बिग बॉस मराठी’ चे पहिले पर्व १५ एप्रिल २०१८ रोजी प्रसारित झाले होते. या पहिल्या पर्वामध्ये अभिनेत्री मेघा धाडे विजयी ठरली होती. त्यानंतर दुसऱ्या पर्वामध्ये शिव ठाकरेने बाजी मारत ‘बिग बॉस मराठी २’ चा किताब जिंकला होता. बिग बॉस मराठीची ही दोन्ही पर्व प्रचंड गाजली होती. प्रेक्षकांचा भरभरून प्रतिसाद मिळाल्याने या कार्यक्रमाचे तिसरे पर्व येणार हे नक्की होते. परंतु ते कधी याची उत्सुकता सर्वांनाच होती. ‘बिग बॉस मराठी ३’ची अधिकृत घोषणा झाल्यामुळे ते कधी पासून प्रसारित होणार, कोण कोण स्पर्धक त्यात सहभागी होणार, त्यांना काय काय टास्क दिले जाणार याकडे आता सर्व प्रेक्षकांचे लक्ष लागले आहे.

महेश मांजेरकरच करणार सूत्रसंचालन

अभिनेते, दिग्दर्शक महेश मांजरेकर यांनी देखील ‘बिग बॉस मराठी ३’ संदर्भात एक ट्वीट केले आहे. या ट्वीटमध्ये त्यांनी ‘त्याच्यासोबत मी परत येतोय… तुम्ही तयार रहा’ असे म्हटले आहे. त्यामुळे ‘बिग बॉस मराठी ३’चे सूत्रसंचालन पुन्हा एकदा महेश मांजरेकर करणार आहेत, हे नक्की झाले आहे.