म. टा. प्रतिनिधी, पुणे

करोनाच्या काळात स्वस्त धान्य दुकानदारांनी विविध मागण्यांसाठी एक मेपासून सुरू केलेला संप स्थगित केला आहे. त्यामुळे गुरुवारपासून नागरिकांना स्वस्त धान्य दुकानांतून धान्य वितरित केले जाणार आहे. (foodgrains will be distributed to the citizens through cheap food shops from thursday)

केंद्र सरकारने पंतप्रधान योजनेंतर्गत मे आणि जून महिन्यात मोफत गहू आणि तांदूळ देण्याचा निर्णय घेतला आहे. राज्य सरकारने मे महिन्याचे धान्य मोफत देण्याचे जाहीर केले आहे. मात्र, स्वस्त धान्य दुकानदारांनी संप सुरू केल्यामुळे धान्य वितरणामध्ये अडथळा निर्माण झाला होता. आता संबंधित नागरिकांना धान्य मिळणार आहे.

राज्य सरकारने स्वस्त धान्य दुकानदारांच्या मागण्या पूर्ण करण्याचे आश्वासन दिले आहे. त्यामुळे संप स्थगित करण्यात आला असल्याचे स्वस्त धान्य दुकानदार संघटनेचे शहराध्यक्ष गणेश डांगी यांनी सांगितले.

क्लिक करा आणि वाचा- रोहित्राला लागली आग; स्फोटाच्या भीतीने नागरिकांमध्ये घबराट

रक्तदानाबाबतची अट शिथिल

लसीकरण केलेल्या लाभार्थ्यांना ५६ दिवसांनी रक्तदान करण्याची पूर्वी असलेली अट आता शिथील करण्यात आली असून आता लसीकरणाच्या प्रत्येक डोसच्या १४ दिवसानंतर रक्तदान करणे शक्य होणार आहे. त्यामुळे १८ ते ४४ वयातील व्यक्तींना रक्तदान करण्यासाठी जास्त दिवस वाट पाहण्याची गरज राहणार नाही. परिणामी, रक्ताचा फारसा तुटवडा होण्याची शक्यता नाही.

क्लिक करा आणि वाचा- महाजनांच्या पाठपुराव्याने जळगावात २० मेट्रीक टन ऑक्सिजनचा टँकर

रुग्णालयांचे फायर ऑडिट सुरू

करोनाबाधित रुग्णांवर उपचार करणाऱ्या विरारमधील रुग्णालयामध्ये आग लागल्याची घटना घडल्यानंतर जिल्हा प्रशासनाने पुणे, पिंपरी चिंचवड शहर आणि जिल्ह्यातील रुग्णालयांचे फायर ऑडिट सुरू केले असून, ७२२ रुग्णालयांपैकी पुणे शहरातील १८५, पिंपरी चिंचवडमधील ४० आणि जिल्ह्यातील १९५ अशा ४२० रुग्णालयांचे ऑडिट पूर्ण झाले आहे. उर्वरित ३०२ रुग्णालयांचे ऑडिटचे काम करण्यात येत असून, ऑडिटमध्ये आढळून आलेल्या त्रुटी १५ दिवसांमध्ये दुरुस्त करण्याचे आदेश विभागीय आयुक्त सौरभ राव यांनी दिले आहेत.

क्लिक करा आणि वाचा- करोना: राज्यात आज ५७ हजारांवर नवी रुग्णवाढ, ९२० मृत्यू

शिवनेरी रस्त्यावर अतिक्रमण कारवाई

मार्केटयार्डातील शिवनेरी रस्त्याच्या दुतर्फा हातगाडीवाले, टपऱ्या, फळे व भाजीपाला विक्रेत्यांचा विळखा वाढल्याने वाहतूक कोंडी वाढली आहे. त्यामुळे पुणे कृषी उत्पन्न बाजार समिती प्रशासनाने शिवनेरी रस्त्यावर अतिक्रमण कारवाई केली. त्या कारवाईत चार टन माल तसेच साहित्य जप्त करण्यात आले आहे. ही कारवाई नियमितपणे अशीच सुरु राहणार असल्याचे समितीच्यावतीने सांगण्यात आले.