मुंबई: राष्ट्रवादी काँग्रेसचे राष्ट्रीय अध्यक्ष शरद पवार यांची काँग्रेस नेत्यांनी त्यांच्या मुंबईतील निवासस्थानी भेट घेतली. पवार यांची भेट घेणाऱ्या काँग्रेस नेत्यांमध्ये काँग्रेसचे महाराष्ट्राचे प्रभारी एच. के. पाटील, महसूल मंत्री बाळासाहेब थोरात आणि सार्वजनिक बांधकाम मंत्री अशोक चव्हाण यांचा समावेश होता. या काँग्रेस नेत्यांमध्ये प्रदेशाध्यक्ष नाना पटोले हे मात्र नव्हते. शरद पवार यांच्या प्रकृतीची चौकशी करण्यासाठी काँग्रेस नेत्यांनी त्यांची भेट घेतल्याचे सांगण्यात येत असले, तरी देखील या भेटीनंतर राजकीय वर्तुळात चर्चा सुरू झाली आहे. (congress leaders meet ncp leader sharad pawar nana patole avoids meeting)

काँग्रेसचे प्रदेशाध्यक्ष नाना पटोले यांचा स्वबळाचा नारा, तसेच वेळोवेळी महाविकास आघाडीविरोधात त्यांनी केलेली वक्तव्ये यामुळे महाविकास आघाडीत आलबेल नसल्याच्या चर्चा महाराष्ट्राच्या राजकीय वर्तुळात सध्या चर्चिल्या जात आहेत. अलिकडेच पवार यांनी मी पटोलेंसारख्या लहान माणसांवर प्रतिक्रिया देत नाही, असे वक्तव्य केले होते. यानंतर काँग्रेस नेत्यांनी पवारांची घेतलेली भेट चर्चेचा मुद्दा बनली आहे. पवार यांच्या भेटीत महाविकास आघाडीत सुरू असलेल्या धुसपुशीवर चर्चा झाल्याचे बोलले जात आहे. इतकेच नव्हे, तर येणाऱ्या स्थानिक स्वराज्य संस्थांच्या निवडणुकीबाबत, तसेच विधानसभेच्या अध्यक्षपदाबाबत देखील या नेत्यांमध्ये चर्चा झाल्याचे समजते. या बरोबरच, केंद्र सरकारने नवे सहकार खाते निर्माण करण्याच्या धोरणावरही या भेटीत चर्चा झाल्याचे बोलले जात आहे.

क्लिक करा आणि वाचा- कौरवही त्यांचे, पांडवही त्यांचे…?; विजय वडेट्टीवार यांचा भाजपला टोला

पटोले यांनी पवार यांची भेट का टाळली?

प्रदेश प्रभारींसह राज्यातील काँग्रेसच्या महत्वाच्या नेत्यांनी आज शरद पवार यांची भेट घेतली. मात्र, या नेत्यांमध्ये काँग्रेसचे महत्वाचे नेते, प्रदेशाध्यक्ष नाना पटोले नसल्याने आश्चर्य व्यक्त केले जात आहे. शरद पवार यांनी कालच पटोले यांच्याबाबत टीकात्मक वक्तव्य केले होते. पटोले यांच्यासारख्या लहान नेत्यांवर मी बोलत नाही, असे पवार यांनी म्हटले होते. पवार यांच्या या वक्तव्यामुळे नाना पटोले कमालीचे नाराज असल्याचे बोलले जात आहे. याच कारणामुळे त्यांनी पवारांची भेट घेणे टाळल्याचे बोलले जात आहे.

क्लिक करा आणि वाचा- शाळकरी मुलीचा पाठलाग करणाऱ्याला न्यायालयाने असा दिला दणका
क्लिक करा आणि वाचा- मल्लिकार्जुन खरगे यांचा पंतप्रधान मोदींवर निशाणा, केला ‘हा’ आरोप