काठमांडू: भारतात करोनाबाधितांच्या वाढत्या संख्येमुळे शेजारचे देशही सतर्क झाले आहेत. भारताचा शेजारचा देश नेपाळनेदेखील २२ ठिकाणी प्रवेश बंदी लागू केली आहे. भारतातून नेपाळमध्ये जाण्यासाठी ३५ ठिकाणी एन्ट्री पॉईंट आहेत. त्यापैकी २२ एन्ट्री पॉईंट बंद केले असल्याचे नेपाळच्या अधिकाऱ्यांनी सांगितले.

नेपाळ आणि भारतात आता फक्त १३ ठिकाणच्या एन्ट्री पॉईंटवरून दळणवळण सुरू राहणार आहे. भारतात करोनाबाधितांची वाढती संख्या लक्षात हा निर्णय घेण्यात आला आहे. नेपाळच्या कोविड संकट व्यवस्थापन समन्वय समितीने एन्ट्री पॉईंट बंद करण्याची शिफारस केली होती. त्यानंतर हा निर्णय घेण्यात आला.

वाचा: ‘या’ देशात करोनाचे मृत्यू तांडव; एकाच महिन्यात एक लाख जणांनी गमावले प्राण

भारतात करोनाबाधितांच्या वाढत्या संख्येमुळे इतर देशही सतर्क झाले आहेत. अमेरिका, कॅनडा, ब्रिटन , संयुक्त अरब अमिरात आदी देशांनी भारतीयांना प्रवेश बंदी केली आहे. अमेरिकेने आपल्या नागरिकांना तातडीने भारत सोडण्याची सूचना केली आहे.

वाचा:करोनाचे थैमान: WHO कडून आणखी एका लशीला मंजुरी

शुक्रवारी भारतात एकाच दिवसांत एकूण ४ लाख ०१ हजार ९९३ करोनाबाधित रुग्ण आढळले. तर याच २४ तासांत ३५२३ जणांना आपले प्राण गमवावे लागले आहेत. याच दिवशी तब्बल २ लाख ९९ हजार ९८८ रुग्णांना रुग्णालयातून डिस्चार्ज देण्यात आला. देशातील एकूण करोनाबाधित रुग्णांची संख्या १ कोटी ९१ लाखांहून अधिक झाली असल्याची माहिती आरोग्य मंत्रालयाने दिली. देशात सध्या ३२ लाख ६८ हजारांहून अधिक करोनाबाधितांवर उपचार सुरू आहेत.

वाचा: भारतात करोनाचे थैमान; ‘या’ कारणांमुळे जगाला सतावतेय चिंता

वाचा:करोनाच्या संसर्गाने पत्रकारांचा मृत्यू; जगात भारत तिसऱ्या स्थानी

दरम्यान, जगभरातील देशांमध्ये करोनाच्या संसर्गाचे थैमान सुरू आहे. भारतात करोनाची दुसरी लाट आली असताना ब्राझीलमध्ये ही करोनाचे थैमान सुरू आहे. ब्राझीलमध्ये एकाच महिन्यात तब्बल एक लाख करोना बळींची नोंद करण्यात आली आहे. ब्राझीलमध्ये आता एकूण करोना बळींची संख्या चार लाखांहून अधिक झाली आहे. जगात सर्वाधिक करोना बळींची नोंद अमेरिकेत झाली असून ब्राझील दुसऱ्या स्थानावर आहे. ब्राझीलमधील परिस्थिती आणखी चिघळणार असल्याचा इशारा तज्ज्ञांनी दिला आहे.