मुंबई: राज्यात करोना संसर्गाची दुसरी लाट वेगाने खाली येत आहे. दैनंदिन करोना बाधितांची संख्या आज आणखी कमी झाली आहे. सोमवारी राज्यात १५ हजार ७७ नवीन रुग्ण आढळले होते तर त्यात आज घट होऊन १४ हजार १२३ नवीन रुग्णांची भर पडली आहे. त्याचवेळी तब्बल ३५ हजार ९४९ रुग्ण बरे होऊन घरी परतल्याने रिकव्हरी रेट ९४.२८ टक्क्यांवर पोहचला असून राज्यासाठी हा खूप मोठा दिलासा ठरला आहे. ( Coronavirus In Maharashtra Latest Update )

वाचा:राज्यात करोनाचे बालरुग्ण वाढताहेत का?; आरोग्य विभागाने दिली आकडेवारी

राज्यात ग्रामीण भागात करोना संसर्गाचा प्रादुर्भाव काही अंशी वाढताना दिसत असला तरी शहरी भागात आणि त्यातही मुंबई, ठाणे, पुणे, नागपूर यासारख्या प्रमुख शहरांत करोना रुग्णांचा आकडा वेगाने खाली येत असल्याने आरोग्य यंत्रणांवरील ताण मोठ्या प्रमाणात कमी झाला आहे. नवीन बाधितांच्या तुलनेत रुग्ण बरे होण्याचे प्रमाणही मोठे असल्याने अॅक्टिव्ह रुग्णांचा आकडाही आता अडीच लाखांच्या खाली आला आहे. एकीकडे दिलासा देणारे आकडे पुढे येत असताना करोना मृत्यूंचे प्रमाण अधिक असल्याने ती चिंता मात्र आजही कायम आहे.

वाचा: कोविड उपचारासाठी दर ठरले; खासगी रुग्णालयांना ठाकरे सरकारची वेसण

राज्यातील करोना संसर्गाची आजची स्थिती

– राज्यात आज ४७७ करोना बाधित रुग्णांच्या मृत्यूंची नोंद.
– सध्या राज्यातील मृत्यूदर १.६७ टक्के एवढा आहे.
– आज राज्यात १४ हजार १२३ नवीन रुग्णांचे निदान.
– दिवसभरात ३५ हजार ९४९ रुग्ण बरे होऊन घरी.
– आजपर्यंत एकूण ५४ लाख ३१ हजार ३१९ रुग्ण करोनामुक्त.
– रुग्ण बरे होण्याचे प्रमाण (Recovery Rate) ९४.२८% एवढे झाले आहे.
– आतापर्यंत तपासण्यात आलेल्या ३,५२,७७,६५३ प्रयोगशाळा नमुन्यांपैकी ५७,६१,०१५ (१६.३३ टक्के) नमुने पॉझिटिव्ह आले आहेत.
– सध्या राज्यात १७,६८,११९ व्यक्ती होम क्वारंटाइनमध्ये आहेत तर ९,३१५ व्यक्ती संस्थात्मक क्वारंटाइनमध्ये आहेत.

वाचा: ‘दोनदा निवडून दिल्यावर मोदी सरकारनं जनतेला हे रिटर्न गिफ्ट दिलं’

मुंबईपेक्षा साताऱ्यात अॅक्टिव्ह रुग्ण

राज्यातील अॅक्टिव्ह रुग्णांचा आकडा अडीच लाखांच्याही खाली आला आहे. सध्या राज्यात २ लाख ३० हजार ६८१ रुग्णांवर उपचार सुरू आहेत. त्यात सर्वाधिक ३० हजार ९२ रुग्ण पुणे जिल्ह्यात आहेत. त्यानंतर सातारा जिल्ह्यात २० हजार ७७७, मुंबईत २० हजार १४७, कोल्हापूर जिल्ह्यात १८ हजार ५९०, ठाणे जिल्ह्यात १८ हजार ३३९ आणि सांगली जिल्ह्यात ११ हजार ९२६ अशी अॅक्टिव्ह रुग्णांची संख्या आहे.

वाचा: तुमची अडचण आम्ही समजू शकतो!; ‘चंपा’ म्हणत शिवसेनेचा पलटवार