मुंबई: राज्यात करोना ससंर्गाचा ग्राफ उतरणीला लागला असून दैनंदिन रुग्णसंख्येत सातत्याने घट होताना दिसत आहे. आज पुन्हा एकदा रुग्णसंख्या १५ हजारांच्या खाली राहिली. गेल्या २४ तासांत राज्यात १४ हजार १५२ नवीन रुग्णांची नोंद करण्यात आली आहे तर २० हजार ८५२ रुग्ण करोनावर मात करून घरी परतले आहेत. दरम्यान, राज्यात आज २८९ करोना बाधित रुग्णांच्या मृत्यूंची नोंद झाली असून सध्या राज्यातील करोना मृत्यूदर १.७ टक्के इतका आहे. ( Coronavirus In Maharashtra Latest News )

वाचा: एम्सचे संचालक म्हणाले, ‘देशातील मुलांना फायजरची लस दिली जाऊ शकते’

राज्यात करोना संसर्गाची दुसरी लाट ओसरत असल्याने लॉकडाऊन उठवला जाईल, अशी शक्यता आहे. करोना पॉझिटिव्हिटी दरानुसार टप्पेनिहाय जिल्हावार अनलॉक करण्याचे नियोजन सरकार पातळीवर केले जात आहे. त्याबाबत अद्याप कोणतेही आदेश निघाले नसले तरी आजची राज्याची आकडेवारी दिलासा देणारी आणि सकारात्मक संकेत देणारी ठरली आहे. राज्यात करोना रुग्णांची संख्या वेगाने कमी होत असून आजही नवीन बाधितांच्या तुलनेत करोनामुक्त रुग्णांची संख्या अधिकच राहिली आहे. मुख्य म्हणजे राज्यातील सक्रिय रुग्णांची संख्या आता २ लाखांच्या खाली आली आहे.

वाचा: ब्लॅक फंगसवरील उपचाराचे दरही ठरले; खासगी रुग्णालयांना दुसरा दणका

राज्यातील करोनाची आजची स्थिती:

– राज्यात आज २८९ करोना बाधित रुग्णांच्या मृत्यूंची नोंद.
– सध्या राज्यातील मृत्यूदर १.७% एवढा आहे.
– आज राज्यात १४ हजार १५२ नवीन रुग्णांचे निदान.
– दिवसभरात २० हजार ८५२ रुग्ण बरे होऊन घरी
– राज्यात आजपर्यंत एकूण ५५,०७,०५८ करोना बाधित रुग्ण झाले बरे.
– राज्यातील रुग्ण बरे होण्याचे प्रमाण (Recovery Rate) ९४.८६% एवढे झाले आहे.
– आजपर्यंत तपासण्यात आलेल्या ३,६०,३१,३९५ प्रयोगशाळा नमुन्यांपैकी ५८,०५,५६५ (१६.११ टक्के) नमुने पॉझिटिव्ह आले आहेत.
– सध्या राज्यात १४,७५,४७६ व्यक्ती होम क्वारंटाइनमध्ये आहेत तर ७,४३० व्यक्ती संस्थात्मक क्वारंटाइनमध्ये आहेत.

सक्रिय रुग्णांची संख्या २ लाखांच्या आत

राज्यातील सक्रिय रुग्णांची संख्या वेगाने कमी होत आहे. आज हा आकडा दोन लाखांच्या खाली आला. सध्या राज्यात १ लाख ९६ हजार ८९४ रुग्णांवर उपचार सुरू आहेत. त्यात सर्वाधिक २२ हजार ७२५ रुग्ण पुणे जिल्ह्यात आहेत तर मुंबई महापालिका क्षेत्रात १८ हजार २६१, कोल्हापूर जिल्ह्यात १८ हजार १७७, ठाणे जिल्ह्यात १६ हजार ९३०, सातारा जिल्ह्यात १६ हजार ७३४ अॅक्टिव्ह रुग्ण आहेत. मुंबईत आज ९६८ नवीन रुग्णांची भर पडली तर पुणे शहरात ३७२ रुग्ण आढळले.

वाचा: लसीकरण: मुंबई महापालिकेचं ग्लोबल टेंडर रद्द, सर्व कंपन्या ठरल्या अपात्र