रोम: कर्णधार हेरी केनच्या डबल धमाक्याच्या जोरावर इंग्लंडने युक्रेनचा पराभव करत युरो कप २०२० च्या सेमीफायनलमध्ये प्रवेश केला. आता सेमीफायनलमध्ये इंग्लंडची लढत डेन्मार्कविरुद्ध होणार आहे. दुसऱ्या एका उपांत्यपूर्वच्या लढतीत डेन्मार्कने चेक प्रजासत्ताकचा २-१ने पराभव केला. १९९६ नंतर इंग्लंडचा संघ प्रथमच युरो कपच्या सेमीफायनलमध्ये पोहोचला आहे.

शनिवारी रात्री झालेल्या अखेरच्या उपांत्यपूर्व फेरीच्या लढतीत इंग्लंडने युक्रेनचा ४-० असा पराभव केला. इंग्लंडने सामन्याच्या सुरुवातीपासूनच युक्रेनवर दबाव ठेवला होता जो अखेरपर्यंत कायम राहिला.

हेरी केनच्या नेतृत्वाखाली इंग्लंड संघाने सामन्याच्या चौथ्या मिनिटाला गोल करत आघाडी घेतली. पहिल्या हाफमध्ये इंग्लंडने १-० अशी आघाडी मिळवली होती. दुसऱ्या हाफमध्ये हैन्नी मॅगुइरेन ४६व्या मिनिटाला गोल करत इंग्लंडची आघाडी २-० अशी केली. त्यानंतर ५०व्या मिनिटाला कर्णधार हेरी केनने गोल करून आघाडी ३-० अशी करून दिली. सामन्याच्या ६२व्या मिनिटाला हॅडरसनने शानदार गोल केला आणि इंग्लंडला ४-० अशी मोठी आघाडी मिळून दिली. हॅडरसनचा हा इंग्लंडकडून पहिला गोल ठरला.

त्याआधी झालेल्या अन्य एका उपांत्यपूर्व फेरीतील लढतीत डेन्मार्कने धमाकेदार विजय केला. डेन्मार्कच्या थॉमस डेलाने पाचव्या मिनिटाला गोल केला आणि संघाला १-० अशी आघाडी मिळवून दिली. त्यानंतर ४२व्या मिनिटाला कॅस्परने दुसरा गोल केला. ४९व्या मिनिटाला चेकच्या पॅट्रिकने गोल करून डेन्मार्कची आघाडी २-१ अशी कमी केली पण चेकला सामन्यात विजय मिळवता आला नाही.