मुंबई : इंडियन आयडल १२ कार्यक्रमावरून कितीही वादंग निर्माण होत असले तरी प्रेक्षकांमध्ये कार्यक्रम अतिशय लोकप्रिय झाला आहे. सर्वसामान्य प्रेक्षकांसोबतच अनेक सेलिब्रिटीदेखील हा कार्यक्रम पाहतात आणि आपल्या आवडत्या स्पर्धकाला पाठिंबा देतात. अलिकडेच महानायक अमिताभ बच्चन यांची नात नव्या नवेली नंदा हिनेदेखील हा कार्यक्रम पाहतानाचे फोटो इन्स्टाग्रामवर शेअर केले आहेत. तसेच स्पर्धेतील एक खास गायक तिचा आवडत असून, त्यासाठी चिअर्सही केले आहे.

नव्याचा आवडता गायक

नव्याने तिच्या इन्स्टाग्राम स्टोरीवर गेल्या आठवड्यामध्ये इंडियन आयडल १२ कार्यक्रम टीव्हीवर पाहतानाचा फोटो शेअर केला होता. या फोटोमध्ये सवाई भट्ट उदीत नारायण मंचावर दिसत होते. हा फोटो शेअर करत नव्याने त्यावर सवाईचे नाव लिहिले आणि इमोजी शेअर केले. या कार्यक्रमात सवाईने गदर सिनेमातील ‘उड जा काले कांवा…’ हे गाणे गायले. कार्यक्रमाच्या परीक्षकांसह अनेकांना त्याचे हे गाणे आवडले. त्यामध्ये नव्याचाही समावेश आहे.

उदीत नारायण यांनीही केले कौतुक

सवाईचे हे गाणे ऐकून उदीत नारायण देखील भारावून गेले. कार्यक्रमानंतर एका मुलाखतीमध्ये त्यांनी सवाईच्या गायन शैलीचे कौतुक केले. ते म्हणाले, ‘लहान असताना मी कठपुतळ्यांचा कार्यक्रम आवडीने बघायचो. अनेक तास मी कठपुतळ्यांचा कार्यक्रम पहात बसायचो. त्यामुळेच सवाई भट्टसोबत मला विलक्षण आपुलकी वाटते. तो या कार्यक्रमात सहभागी झाल्यानंतर त्याची जी काही प्रगती झाली आहे ती खरोखरच कौतुकास्पद आहे. इंडियन आयडलच्या या सिझनमधील तो सर्वोत्कृष्ट गायक आहे, असे मी अभिमानाने म्हणू शकतो.’

दरम्यान, गेल्या आठवड्यात हा कार्यक्रम प्रसारित झाला. त्या कार्यक्रमात उदीत नारायण यांच्यासह अभिजीत भट्टाचार्य, जुन्या काळातील ज्येष्ठ अभिनेत्री झीनत अमान देखील पाहुणे म्हणून उपस्थित होते.

इंडियन आयडल १२ आणि वाद

गेल्या काही दिवसांपासून इंडियन आयडल १२ कार्यक्रमावरून विविध वाद सुरू आहे. किशोर कुमार यांच्यावरील विशेष भागामध्ये अमित कुमार सहभागी झाले होते. कार्यक्रम प्रसारित झाल्यानंतर त्यांनी निर्मात्यांनी कार्यक्रमाचे, स्पर्धकांचे कौतुक करण्यास सांगितल्याने एकच खळबळ उडाली होती. त्यावरून निर्माण झालेला वाद अद्याप सुरूच आहे. या वादावरून तसेच स्पर्धकांच्या गायन शैलीवरून सोशल मीडियावर अनेकजण कार्यक्रमाला, स्पर्धकांना ट्रोल करत आहेत.