मुंबई: बॉलिवूडचा दिवंगत अभिनेता सुशांतसिंह राजपूतच्या एक वर्ष पूर्ण होत आहे. मागच्या वर्षी १४ जूनला सुशांतनं राहत्या घरी आत्महत्या करत जीवन संपवलं होतं. त्यानंतर आता सुशांतशी संबंधीत ड्रग्स प्रकरण पुन्हा एकदा चर्चेत आलं आहे. काही दिवसांपूर्वीच NCB नं सुशांतचा फ्लॅटमेट आणि मित्र सिद्धार्थ पिठानीला या ड्रग्स प्रकरणात अटक केली होती. एवढंच नव्हे तर सुशांतच्या घरी काम करणाऱ्या नीरज आणि केशव या दोन्ही नोकरांचीही चौकशी केली. दरम्यान या प्रकरणात सुशांतची गर्लफ्रेंड रिया चक्रवर्तीला मुख्य आरोपी मानण्यात आलं आहे आणि NCB च्या चौकशीत रियानं सुशांतची बहीण आणि तिच्या नवऱ्याबाबत काही धक्कादायक खुलासे केले आहेत.

NCB च्या चौकशीत रियानं सुशांतसिंह राजपूत संबंधीत ड्रग्स प्रकरणाबाबत धक्कादायक खुलासे केलेले आहेत. एवढंच नाही तर सुशांत त्याची बहीण आणि बहिणीच्या नवऱ्यासोबत ड्रग्स घेत असे असंही तिनं म्हटलं आहे. रिया चक्रवर्तीनं लिहिलं, ‘मला हे सांगायचं आहे की, ज्या गोष्टींचा वर उल्लेख केलेला आहे, ते डॉक्टर निकिताचं प्रिस्क्रिप्शन आहे (रिया आणि शौविकचे मेसेज आणि प्रिस्क्रिप्शनची कॉपी)मी आणि शौविक गुगलच्या मदतीनं Clomnezepan चे साइड इफेक्ट काय असतात याबाबत चर्चा करत होतो. डॉक्टरांशी बोलल्यानंतर त्यांनी ती औषधं प्रिस्क्रिप्शननुसार सुशांतला देत राहण्याचा सल्ला दिला होता.’

रिया चक्रवर्तीनं आपल्या स्टेटमेंटमध्ये पुढे लिहिलं, ‘सुशांतची तब्येत दिवसेंदिवस बिघडत होती ज्यामुळे शौविकला चिंता वाटत होती. Clomnezepan आणि त्याचे साइड इफेक्ट यावर आम्ही चर्चा करत होतो. डॉक्टर निकिताशी चर्चा केल्यानंतर आम्हाला समजलं की आम्हाला गुगल डॉक्टर व्हायला नको. ८ जून २०२० रोजी सुशांतला त्याची बहिण प्रियांकाचा एक व्हॉट्सअॅप मेसेज मिळाला होता. ज्यात librium 10 mg, nexito हे NDPS मधील ड्रग्स घेण्याबद्दल सांगण्यात आलं होतं. तिनं कार्डिओलॉजिस्च डॉक्टर तरूण यांचं प्रिस्क्रिप्शन दिलं होतं. त्यांनी सुशांतला न भेटता किंवा न तपासताच ओपीडी रुग्ण असल्याचं निदान केलं होतं. याचा अर्थ सुशांतला लगेचच रुग्णालयात दाखल करण्याची गरज होती आणि ही औषधं सायकॅट्रीस्टच्या सल्ल्याशिवाय दिली जात नाहीत.’

आपल्या स्टेटमध्ये रियानं म्हटलंय, ‘मी निवेदन करते की, सुशांतची बहीण मितू ज्यावेळी त्याच्यासोबत ८ ते १२ जून या काळात राहत होती त्यावेळीचं त्याचा ड्रग्समुळे मृत्यू झाला असता. मी मुंबई पोलिसांना याची कल्पना दिली होती. सुशांत माझ्या संमतीशिवायच Marijuana चं सेवन करत होता. आम्ही दोघं भेटण्याच्या आधीपासूनच तो याचं सेवन करत होता. मी त्याला Marijuana द्यावं किंवा मला ते ऑफर करण्यासाठी तो माझ्याकडे येत असे.’

रियानं पुढे लिहिलं, ‘मी सुशांतला रुग्णालयात दाखल करण्याचा प्रयत्न केला होता. ज्याचे पुरावे माझ्याकडे आहेत. पण त्याची याला परवानगी नव्हती. त्यामुळे त्याला रुग्णालयात दाखल करुन घेण्यात आलं नाही. सुशांतला Marijuana चं व्यसन लागलं आहे हे त्याच्या कुटुंबीयांना चांगल्याप्रकारे माहीत होतं. एवढंच नाही तर सुशांतची बहीण प्रियांका आणि तिचा नवरा सिद्धार्थही Marijuana चं सेवन करत असत आणि सुशांतलाही आणून देत असत. हे विधान करताना आता मला कोणीच्याही धमकी भीती वाटत नाही.’