हायलाइट्स:
- प्रदीप शर्मा यांना २८ जूनपर्यंत एनआयए कोठडी.
- मनसुख हिरन हत्या प्रकरणी झाली आहे अटक.
- पोलीस दलातील गटबाजीतून गोवल्याचा शर्मा यांचा आरोप.
वाचा: एन्काउंटर स्पेशालिस्ट प्रदीप शर्मा यांना ‘एनआयए’कडून अटक
उद्योगपती मुकेश अंबानी यांच्या अँटिलिया निवासस्थानाबाहेर स्कॉर्पिओ कारमध्ये आढळलेली स्फोटकं आणि या कारचा मालक मनसुख हिरन याच्या हत्येचा तपास राष्ट्रीय तपास संस्था (एनआयए) करत आहे. हिरन हत्येप्रकरणी गेल्या अनेक दिवसांपासून माजी एन्काउंटर स्पेशालिस्ट प्रदीप शर्मा हे एनआयएच्या रडारवर होते. मात्र, ठोस पुरावे हाती लागत नसल्याने त्यांच्यावर कारवाई करण्यात आली नव्हती. मिळालेल्या माहितीनुसार, याप्रकरणी संतोष आत्माराम शेलार आणि आनंद पांडुरंग जाधव या दोघांना अटक केल्यानंतर त्यांच्या तपासात एनआयएला महत्त्वाची माहिती मिळाली. त्या माहितीच्या आधारावरच प्रदीप शर्मा यांना अटक करण्यात आली आहे.
वाचा: संजय राऊतांकडून राज्यपालांना हटके शुभेच्छा; गिफ्टही मागितलं
अंधेरीतील जे. बी. नगर येथे भगवान भवन बिल्डिंगमध्ये शर्मा यांचे घर असून आज सकाळी साडेसहा वाजताच एनआयएचं पथक सीआरपीएफ जवानांसह तिथे दाखल झालं होतं. तिथे झडती घेतल्यानंतर व चौकशी केल्यानंतर शर्मा यांना अटक करण्यात आली. त्यानंतर शर्मा यांना विशेष एनआयए कोर्टात हजर करण्यात आले असता २८ जूनपर्यंत एनआयए कोठडी देण्यात आली आहे. शर्मा यांच्यासह संतोष शेलार आणि आनंद जाधव या दोघांचीही २८ जूनपर्यंत एनआयए कोठडीत रवानगी करण्यात आली आहे. दरम्यान, प्रदीप शर्मा यांनी पोलीस दलातील दोन गटांमध्ये असलेल्या भांडणातून आपल्याला या प्रकरणात गोवण्यात आल्याचा आरोप केला आहे.
वाचा: वाद मिटला?; राज्यपालांना शुभेच्छा देण्यासाठी मुख्यमंत्री ठाकरे राजभवनावर
संतोष शेलार प्रदीप शर्मा यांचा निकटवर्तीय
मनसुख हिरन हत्या प्रकरणी संतोष शेलार आणि आनंद जाधव या दोघांची महत्त्वाची भूमिका असल्याचे एनआयएमधील सूत्रांचे म्हणणे आहे. हे दोघेही मालाडमधील कुरार व्हिलेज येथील राहणारे आहेत. यापैकी संतोष शेलार हा प्रदीप शर्मा यांचा निकटवर्तीय असल्याचे सांगितले जात आहे. त्याअनुषंगानेही एनआयएचा तपास सुरू आहे.
वाचा: बलात्काराच्या गुन्ह्यात अखेर निलंबित पोलीस निरीक्षकाला अटक