मुंबई– कारगिल युद्धात महत्वाची भूमिका निभावणारे आणि शत्रूशी दोन हात करून विजय मिळवणारे कप्तान विक्रम बत्रा यांच्या आयुष्यावर आधारित ‘शेरशाह‘ चित्रपटाचा टीजर नुकताच प्रदर्शित करण्यात आला. चित्रपटाच्या टीजरला प्रेक्षकांचा भरभरून प्रतिसाद लाभला असून चित्रपटात अभिनेता सिद्धार्थ मल्होत्रा मुख्य भूमिकेत आहे. सिद्धार्थ चित्रपटात विक्रम यांचं पात्र साकारत असून त्याच्यासोबत अभिनेत्री कियारा अडवाणी विक्रम यांच्या होणाऱ्या पत्नीच्या भूमिकेत आहे.

Photo- करिनाच्या दुसऱ्या मुलाचा फोटो आला समोर, चाहते म्हणाले

सिद्धार्थने त्याच्या इन्स्टाग्राम अकाउंटवर ‘शेरशाह ‘ चित्रपटाचा टीजर शेअर केला आहे. चित्रपटाच्या टीजरमध्ये खऱ्या कारगिल युद्धातील काही व्हिडीओ दाखवण्यात आले आहेत. यात कप्तान विक्रम आणि कारगिल युद्धात प्रत्यक्षात असणारी परिस्थिती दाखवण्यात आली आहे. टीजरमध्ये विक्रम त्यावेळचा एक किस्सा देखील सांगत आहेत जेव्हा दहशतवाद्यांनी त्यांना पर्वतावर बसून चॅलेंज दिलं होतं. हा टीजर शेअर करत सिद्धार्थने लिहिलं, ‘हिरो आपल्या कथांमध्ये नेहमी जिवंत राहतात. आम्हाला तुमच्यासमोर कारगिल युद्धातील खरे हिरो कप्तान विक्रम बत्रा यांची कथा सादर करताना आनंद होत आहे. हा चित्रपट माझ्यासाठी एक मोठा प्रवास होता. ज्यात मी एका खऱ्या आयुष्यातील व्यक्तीची भूमिका साकारली आणि मला त्या गोष्टीचा प्रचंड अभिमान आहे.’

कारगिल युद्धातील भारतीय सैनिकांच्या शौर्याची गाथा सांगणारा ‘शेरशाह’ चित्रपट १२ ऑगस्ट रोजी अमेझॉन प्राइम व्हिडीओवर प्रदर्शित करण्यात येणार आहे. ‘शेरशाह’ यापूर्वी जुलै २०२० मध्ये प्रदर्शित करण्यात येणार होता परंतु, करोना महामारीमुळे प्रदर्शनाची तारीख पुढे ढकलण्यात आली. सोबतच अभिनेता अजय देवगणचा ‘भुज: द प्राइड ऑफ इंडिया’ चित्रपटही १३ ऑगस्ट रोजी प्रदर्शित होणार असल्याने या दोन्ही चित्रपटांत लढत पाहायला मिळू शकते.

मंदिरा बेदीने एकटीने सेलिब्रेट केला लग्नाचा २३ वा वाढदिवस