The Family Man 2- मुंबई पोलिसांनी केलं चेल्लम सरांवर ट्वीट, म्हणतात- चिलीम हवीए…

मुंबई– सध्या ओटीटीवर एकाच वेब सीरिजचा बोलबाला आहे ती म्हणजे मनोज बाजपेयी याची ‘द फॅमिली मॅन २‘. ही वेब सीरिज प्रेक्षकांना इतकी पसंत पडली आहे की चाहते सीरिजमधील प्रत्येक पात्राचं भरभरून कौतुक करत आहेत. त्यातही संपूर्ण सीरिजमध्ये फक्त १५ मिनिटांच्या कालावधीसाठी दिसलेले चेल्लम सर सीरिजच्या यशाचं अर्ध श्रेय घेऊन गेले असं म्हटलं, तर वावगं ठरणार नाही. चेल्लम सरांच्या स्टाइलने सामान्य प्रेक्षकांना तर भुरळ घातलीच आहे शिवाय पोलिसही आता त्यांची मदत घेताना दिसत आहेत. यापूर्वी उत्तर प्रदेश पोलिसांनी ट्वीट करत चेल्लम सरांचं कौतुक केलं होतं. आता मुंबई पोलिसांनीही त्यांच्या पावलावर पाउल ठेवलं आहे.

जेव्हा सेटवर रणवीरला जाणवलेला पेशव्यांचा आत्म्याचा वावर

मुंबई पोलिसांनीही एक हटके ट्वीट करत गुन्हेगारांना संदेश देण्यासाठी चेल्लम सरांच्या पात्राचा पुरेपूर वापर केला. मुंबई पोलिसांनी ट्वीट करत अंमली पदार्थांचं सेवन करणं गुन्हा असल्याचं सांगितलं आहे. पोलिसांनी केलेल्या या ट्वीटमध्ये चेल्लम सर एका नागरिकासोबत बोलताना दाखवण्यात आले आहेत. त्यावर एक व्यक्ती त्यांच्याकडे चिलीम मागत आहे. तर चेल्लम सर त्याला हटके स्टाइलमध्ये उत्तर देत म्हणतात, ‘COD (कॉप्स ऑन डिलिव्हरी) साठी १०० डायल करा.’ मुंबई पोलिसांच्या या ट्वीटचं युझर्सही कौतुक करत आहेत.

यापूर्वी उत्तर प्रदेश पोलिसांनी चेल्लम सरांच्या मदतीने त्यांच्या क्षेत्रात जनजागृती करण्याचा प्रयत्न केला होता. त्यांनी ट्वीट करत संकटात सापडलेल्या प्रत्येक कुटुंबासाठी ११२ हा एकच नंबर असल्याचं म्हटलं होतं. वेब सीरिजमध्ये फार थोड्या कालावधीसाठी दिसलेल्या चेल्लम सरांची लोकप्रियता दिवसेंदिवस वाढतच आहे.

पर्ल पुरीवरील आरोप खरे, मुलीने फोटो पाहून सांगितलेली ओळख