मुंबई : छोट्या पडद्यावरील ‘नागिन ३ ‘ मालिकेतील अभिनेता पर्ल वी पुरीला अल्पवयीन मुलीवर बलात्कार केल्याप्रकरणी अटक करण्यात आली. त्यानंतर छोट्या पडद्यावरील कलाकारांना आश्चर्याचा धक्का बसला. पर्ल लावलेले सर्व आरोप खोटे असल्याचे सांगत अनेक कलाकारांनी त्याला जाहीरपणे पाठिंबा दिला. यामध्ये अनिता हसनंदानी, एकता कपूर यांचा समावेश आहे.

पर्ल वी पुरीला अटक, अल्पवयीन मुलीवर बलात्काराचा आरोप

एकता कपूरने शेअर केली पोस्ट

बालाजी प्रॉडक्शनची सर्वेसर्वा असलेल्या एकता कपूरने देखील पर्लला पाठिंबा दर्शवला आहे. पर्लवर लावलेले सर्व आरोप खोटे असून नेमके काय घडले हे सांगणारी मोठी पोस्ट एकताने तिच्या इन्स्टाग्रामवर शेअर केली आहे. तिने लिहिले आहे, ‘एखाद्या चिमुरड्या मुलीचे लैंगिक शोषण करणाऱ्या व्यक्तीला मी पाठिंबा देईन असे तुम्हाला वाटते का? परंतु काल रात्रीपासून आतापर्यंत जे काही घडले ते अतिशय वाईट होते. माणुसकी इतक्या खालच्या पातळीवर कशी जाऊ शकते याचे मला आश्चर्य वाटते?’

कुणी व्यक्ती असे कसे करू शकते?

एकता कपूरने तिच्या पोस्टमध्ये पुढे लिहिले की, ‘एखादी व्यक्ती दुसऱ्या व्यक्तीला किती त्रास देऊ शकते. तिसऱ्या व्यक्तीबरोबर असलेल्या भांडणामध्ये भलत्याच व्यक्तीला कसे गोवले जाते? एखादा माणूस दुसऱ्या माणसासोबत असे कसे वागू शकतो? पीडित मुलीच्या आईसोबत मी अनेकदा बोलले आहे. तिने स्वतः मला सांगितले की या सर्व प्रकरणामध्ये पर्लचा काहीही दोष नाही. तिचा नवरा खोटे कुंभाड रचण्याचा प्रयत्न करत आहे. त्यातून ती आई म्हणून कशी वाईट आहे, त्यांच्या मुलीची ती कशी काळजी घेऊ शकत नाही, हे त्याला दाखवून द्यायचे आहे. हे सर्व काही आहे ते खूपच भयानक आहे.’

‘मी टू’चा गैरवापर

एकताने पुढे लिहिले आहे की, ‘ हे जर सगळे सत्य असेल तर ते अनेक पातळ्यांवर चुकीचे आहे. यामध्ये मी टू चळवळीचा वापर करणे, मुलीला त्रास देणे आणि एखाद्या निर्दोष व्यक्तीला दोषी ठरवणे हे अत्यंत घृणास्पद आहे. मला याबाबत काहीही ठरवण्याचा अधिकार नाही. कोण बरोबर आहे आणि कोण चुकीचे आहे कोर्टात सिद्ध होईलच. माझे हे सर्व म्हणणे त्या मुलीच्या आईशी काल झालेल्या बोलण्यावर आधारीत आहे. त्यावेळी तिने मला सांगितले की या प्रकरणामध्ये पर्ल निर्दोष आहे. वाईट गोष्ट ही आहे की तुमचा लोक चुकीच्या पद्धतीने वापर करत आहे.’

‘पर्ल पुरीवरील बलात्काराचा आरोप खोटा’; अनीता हसनंदानीनं पर्लला दिला पाठिंबा
पिडीत मुलीच्या आईची व्हॉईस नोट

एकताने पुढे असेही लिहिले आहे की, ‘माझ्याकडे त्या मुलीच्या आईचे अनेक व्हॉईस नोट्स आणि मेसेज आहेत. त्यावरून हे कळते की पर्लवर लावलेले सर्व आरोप खोटे आहेत. सिनेमा विश्व हा इतर व्यवसायांसारखाच सुरक्षित आणि असुरक्षित आहे. येथील लोक आपल्या स्वार्थासाठी दुस-याला वाईट म्हणतात आणि ही गोष्ट सर्वात नीचपणा दाखवणारी आहे. जर पर्ल निर्दोष सिद्ध झाला तर मी सर्व लोकांना आवाहन करीन की बघा आजच्या काळामध्ये कशापद्धतीने एखाद्या गोष्टीचा दुरूपयोग केला जात आहे. सत्याचा विजय असो! ‘

अनिता हसनंदानीनेही दिला पर्लला पाठिंबा

पर्ल पुरीवर जेव्हा बलात्काराचा आरोप होऊन त्याला अटक झाल्याची बातमी आली. ही बातमी ऐकून टीव्ही अभिनेत्री अनिता हसनंदानीने हे सगळे धादांत खोटे असून, त्याच्यावर माझा अजिबात विश्वास नसल्याची पोस्ट सोशल मीडियावर शेअर केली होती. तसेच हे प्रकरण काही तरी वेगळेच असल्याचा संशय व्यक्त केला होता. तसेच तिने पर्ल हा निर्दोष असून त्याला पाठिंबा दर्शवला होता. लवकरच या प्रकरणातील सत्य काय आहे ते बाहेर येईल, असे सांगत पर्लला पाठिंबा जाहीर केला होता.