मुंबई: ‘बिग बॉस १३’ फेम पारस छाब्रा आतापर्यंत अनेक म्युझिक व्हिडीओंमध्ये झळकला आहे. पण त्याच्या चाहत्यांना तो शो किंवा चित्रपटात कधी दिसणार याची फार उत्सुकता आहे. अर्थात पारसला देखील असं काम करायचं आहेय पण त्याला अद्याप म्हणावी तशी चांगली भूमिका ऑफर झालेली नाही. या उलट त्याला बोल्ड शो किंवा इंटीमेट सीनच्या ऑफर्स मिळाल्या आहेत. आता यावर पारसनं नुकत्याच दिलेल्या मुलाखतीत भाष्य केलं आहे.

पारस छाब्रानं नुकत्याच ई-टाइम्सला दिलेल्या मुलाखतीत त्याच्या करिअर आणि ऑफर होणाऱ्या भूमिकांबद्दल सविस्तर सांगितलं. या मुलाखतीत, आपल्याला ओटीटी प्लॅटफॉर्मसाठी काम करायचं आहे पण त्यातही आपल्याला बोल्ड शोसाठी विचारणा केली जात असल्याचं पारसनं सांगितल. तसेच अशा शोसाठी नकार दिल्याचंही त्यानं स्पष्ट केलं.

पारस छाब्रा म्हणाला, ‘ओटीटी प्लॅटफॉर्मवर बोल्ड किंवा इंटीमेट सीन्ससाठी कोणत्याही प्रकारची बंधनं नाहीत हे मला माहीत आहे. मात्र माझ्या स्वतःच्या काही मर्यादा आहेत. अलिकडच्या काळात मला अशा बऱ्याच शोच्या ऑफर मिळाल्या आहेत. ज्यात प्रमाणापेक्षा जास्त बोल्ड आणि इंटीमेट सीनची गरज होती. पण मला वाटतं अशा सीनची खरं तर शोमध्ये फारशी गरज नसते. स्टोरी लाइन आणि बोल्ड सीनमध्ये कोणत्याही प्रकारचं कनेक्शन नसतं. शोमध्ये मसाला म्हणून असे सीन शक्यतो वापरले जातात. ज्याची चर्चा व्हावी हा हेतू असतो.’

पारस पुढे म्हणाला, ‘बोल्ड होण्याच्या प्रयत्नात आता मेकर्स आजकाल कलाकारांचं सर्वकाही सार्वजनिक प्लॅटफॉर्मवर उघड करत आहेत. मला पॉर्नस्टार नाही अभिनेता व्हायचंय.’ पारसच्या कामाबद्दल बोलायचं तर तो काही दिवसांपूर्वी रुबीना दिलैकसोबत एका म्युझिक व्हिडीओमध्ये दिसला होता. याशिवाय बिग बॉस १३ नंतर तो शहनाझ गिलसोबत ‘मुझसे शादी करोगे’ या स्वयंवर शोमध्ये दिसला होता. याशिवाय तो बिग बॉस १३ ची स्पर्धक माहिरा शर्मासोबतही काही म्यूझिक व्हिडीओमध्ये झळकला होता.