मुंबई-ठाणे शिधावाटप विभागाच्या कारवाईत ९४.३७ लाखांचा मुद्देमाल जप्त – महासंवाद

मुंबई, दि. २७ : मुंबई-ठाणे शिधावाटप विभागाच्या भरारी पथकाने नवी मुंबईतील तुर्भे परिसरात अवैधरित्या इंधन काढण्याच्या प्रकारावर कारवाई करत दोन टँकरसह सुमारे १४ हजार लिटर डिझेल आणि २५ हजार लिटर पेट्रोलियमसदृश द्रवपदार्थ जप्त केला आहे. या कारवाईत जप्त केलेल्या मुद्देमालाची एकूण अंदाजित किंमत ९४ लाख ३६ हजार ७०८ रुपये आहे. याप्रकरणी पाच जणांविरुद्ध तुर्भे पोलीस ठाण्यात गुन्हा दाखल करण्यात आला आहे.

नियंत्रक शिधावाटप व संचालक नागरी पुरवठा, मुंबई, चंद्रकांत डांगे यांच्या मार्गदर्शनाखाली उपनियंत्रक शिधावाटप अंमलबजावणी गणेश बेल्लाळे यांच्या पथकातील अधिकारी व कर्मचाऱ्यांनी ही संयुक्त कारवाई केली.

डिझेलची वाहतूक करणाऱ्या WB 19 L 2981 या टँकरच्या आउटलेटमधून अवैधरित्या डिझेल काढून MH 46 BM 9202 या दुसऱ्या टँकरच्या इंधन टाकीत भरले जात असल्याची बाब निदर्शनास आल्यानंतर पथकाने छापा टाकला. या कारवाईदरम्यान दोन्ही टँकर आणि त्यामधील इंधनसदृश पदार्थ जप्त करण्यात आले.

याप्रकरणी दोन्ही टँकरचे चालक-मालक अशा एकूण पाच जणांविरुद्ध तुर्भे पोलीस ठाणे, नवी मुंबई येथे गुन्हा दाखल करण्यात आला आहे. या प्रकरणाचा पुढील तपास तुर्भे पोलीस करीत आहेत.

कारवाईत सहभागी अधिकारी-कर्मचारी

नियंत्रक शिधावाटप व संचालक नागरी पुरवठा, मुंबई यांच्या कार्यालयातील भरारी पथकाचे सहायक नियंत्रक शिधावाटप प्रदीप काळे, मुख्य निरीक्षण अधिकारी नागनाथ हंगरगे, शिधावाटप निरीक्षक अमोल बुरटे, दिपेंद्र परुळेकर, राहुल इंगळे आणि विकास नागदिवे यांनी या कारवाईत सहभाग घेतला. तसेच बेलापूर शिधावाटप कार्यालयाच्या शिधावाटप अधिकारी छाया पालवे आणि शिधावाटप निरीक्षक प्रकाश पराते, सचिन हेंबाडे, विक्रम धुमाळ व सागर गराडे उपस्थित होते.

0000

वंदना थोरात/विसंअ