मुंबई: काही दिवसांपूर्वीच लोकप्रिय वेब सीरिज ‘द फॅमिली मॅन’चा दुसरा सीझन रिलीज झाला. ज्याची चर्चा अद्याप सोशल मीडियावर होताना दिसत आहे. पहिला सीझनप्रमाणे या वेब सीरिजचा दुसरा सीझनही गाजला. पण सर्वाधिक चर्चेत राहिली ती या वेब सीरिजमधील ‘चेल्लम सर’ ही भूमिका. वेब सीरिजचा नायक श्रीकांत तिवारीला एवढ्या मोठ्या मिशनमध्ये वेळोवेळी मदत करणारे चेल्लम सर सर्वांनाच भावले. ही भूमिका एवढी लोकप्रिय झाली की मुंबई पोलिसांनी देखील जनजागृतीसाठी त्याचा पुरेपुर वापर करून घेतल होता. ज्यावर आता चेल्लम सर म्हणजेच अभिनेता उदय महेश यांनी मुंबई पोलिसांच्या त्या मजेदार ट्वीटवर उत्तर दिलं आहे.

The Family Man 2- मुंबई पोलिसांनी केलं चेल्लम सरांवर ट्वीट, म्हणतात- चिलीम हवीए…
चेल्लम सर ही भूमिका साकारणारे अभिनेता उदय महेश यांचं म्हणणं आहे की, हे सर्व केवळ सोशल मीडियाच्या आर्टवर्कमुळे शक्य झालं आहे. यामुळे त्यांच्या भूमिकेला एवढं प्रेम मिळालं आहे. सोशल मीडियावरील मीम्स पाहिल्यानंतर त्यांच्या भूमिकेला लोकांनी किती गांभीर्यानं घेतलं हे त्यांना जाणवलं. नुकत्याच दिलेल्या मुलाखतीत ते म्हणाले, ‘मी मुंबई पोलिसांचे आभार मानतो. त्यांनी माझ्यावर तयार करण्यात आलेल्या मीम्सचा खूपच चांगला वापर करत आहेत. लोकांनी माझी भूमिका किती गांभीर्यानं घेतली हे मुंबई पोलिसांचं ट्वीट पाहिल्यानंतर जाणवलं. कारण ही भूमिका एवढी लोकप्रिय होईल असं मला अजिबात वाटलं नव्हतं.’

दरम्यान मुंबई पोलिसांनी एक हटके ट्वीट करत गुन्हेगारांना संदेश देण्यासाठी चेल्लम सरांच्या पात्राचा पुरेपूर वापर केला होता. ज्यात मुंबई पोलिसांनी ट्वीट करत अंमली पदार्थांचं सेवन करणं गुन्हा असल्याचं सांगितलं आहे. पोलिसांनी केलेल्या या ट्वीटमध्ये चेल्लम सर एका नागरिकासोबत बोलताना दाखवण्यात आले आहेत. त्यावर एक व्यक्ती त्यांच्याकडे चिलीम मागत आहे. तर चेल्लम सर त्याला हटके स्टाइलमध्ये उत्तर देत म्हणतात, ‘COD (कॉप्स ऑन डिलिव्हरी) साठी १०० डायल करा.’ मुंबई पोलिसांच्या या ट्वीटचं युझर्सनी कौतुक खूप कौतुक केलं होतं.

Fees For Family Man 2- मनोज बाजपेयी ते समंथा अक्किनेनी, कलाकारांनी घेतलं कोट्यवधींचं मानधन
द फॅमिली मॅन’चा पहिला सीझन सुपरहीट ठरला होता. त्यामुळे उदय महेश यांनी ‘द फॅमिली मॅन २‘मधील चेल्लम सर या भूमिकेसाठी होकार दिला होता. पण त्यावेळी त्यांना ही भूमिका एवढी लोकप्रिय होईल याची जराही कल्पना नव्हती. उदय महेश सांगतात, ‘जर निर्मात्यानं प्रेक्षकांना काय आवडतं याची भविष्यवाणी करू शकला तर प्रत्येक चित्रपट हिट होऊ शकतो पण हे शक्य नाही. आपण फक्त प्रयत्न करू शकतो आणि स्वतःच्या कामावर विश्वास ठेऊ शकतो. बाकी अखेर सर्व गोष्टी प्रेक्षकांवर अवलंबून असतात.’