उपनगरी रेल्वेमधून प्रवास करण्यासाठी अत्यावश्यक सेवेतील कर्मचारी असल्याचे भासवणाऱ्या बनावट ओळखपत्रांची सुळसुळाट होत असतानाच, रेल्वे पोलिसांच्या गुन्हे शाखेच्या पथकाने बनावट पास बनवणाऱ्याला बेड्या ठोकल्या आहेत. धनंजय बनसोडे (२८) असे या आरोपीचे नाव आहे. करोनाकाळात सामान्यांची गैरसोय लक्षात घेता बनावट पासच्या मोबदल्यात प्रवाशांकडून लाखो रुपये उकळल्याचा संशय पोलिसांना आहे. रेल्वे न्यायालयाने या आरोपीला तीन दिवसांची पोलिस कोठडी सुनावली आहे.

एक व्यक्ती महापालिका आणि आरोग्य सेवेतील बनावट ओळखपत्र तयार करून रेल्वे स्थानकावंर विकत असल्याची माहिती रेल्वे पोलिसांच्या गुन्हे शाखेला मिळाली. त्यानुसार ३ जून रोजी दुपारी १ वाजता पोलिसांनी कल्याण स्थानकातील फलाट क्रमांक १ वर सापळा रचत आरोपीला अटक केली. आरोपीकडून मुंबई महापालिका आणि सार्वजनिक आरोग्य खात्याची बनावट ओळखपत्रे, रबरी शिक्के, अधिकाऱ्यांच्या स्वाक्षऱ्या जप्त करण्यात आल्या. सरकारच्या प्रतिबंधात्मक आदेशाचे उल्लंघन करून बनावट ओळखपत्र तयार करून रेल्वे प्रशासनाची आणि महापालिकेची फसवणूक केल्याप्रकरणी त्याला गजाआड करण्यात आले. या आरोपीवर आपत्ती व्यवस्थापन कायद्याच्या कलमांखालीदेखील गुन्हा नोंदवण्यात आल्याचे रेल्वे पोलिसांनी सांगितले.

फेसबुकवरून केली जाहिरात

कल्याण : धनंजय हा मुंबई महापालिकेच्या फ प्रभाग कार्यालयातील आरोग्य विभागात कंत्राटी पद्धतीने काम करत होता. तीन महिन्यांपासून त्याला पगार मिळत नसल्याने पैशांची जमवाजमव करण्यासाठी त्याने ही शक्कल लढवली होती. त्याने तीन दिवसांपासून बनावट ओळखपत्र तयार करण्याचा निर्णय घेतला. यासाठी त्याने काम करत असलेल्या कार्यालयातून रबर सही-शिक्क्याचा स्टॅम्प आणि कोरे फॉर्म मिळवले. विशेष म्हणजे, अत्यावश्यक सेवेतील कर्मचारी म्हणून रेल्वे प्रवासाची मुभा मिळण्यासाठी कोणाला ओळखपत्र हवे असेल, तर आपल्याशी संपर्क साधावा असे आवाहनही त्याने चक्क फेसबुकमार्फत केले होते.