मुंबई, दि. २ : वर्धा जिल्हा मध्यवर्ती सहकारी बँकेवर महाराष्ट्र राज्य सहकारी बँकेची प्राधिकृत अधिकारी म्हणून नियुक्ती करण्याबाबत तसेच नागपूर जिल्हा मध्यवर्ती सहकारी बँकेतील अधिकारी व कर्मचाऱ्यांना वरिष्ठ श्रेणीमध्ये पदोन्नती देण्यासंदर्भातील प्रस्ताव मुख्यमंत्री यांच्या मान्यतेसाठी पाठविण्यात येणार असल्याची माहिती सहकार मंत्री बाबासाहेब पाटील यांनी दिली.
मंत्रालयात सहकार मंत्री बाबासाहेब पाटील यांच्या अध्यक्षतेखाली वर्धा तसेच नागपूर जिल्हा मध्यवर्ती सहकारी बँकांशी संबंधित विविध प्रशासकीय विषयांचा आढावा घेण्यात आला. यावेळी नागपूर जिल्हा मध्यवर्ती सहकारी बँकेसमोरील प्रशासकीय अडचणींबाबत सविस्तर चर्चा करण्यात आली.
यावेळी राज्यातील १६ बँकांशी संबंधित विविध प्रकरणांवर निर्णय घेण्यासाठी मुख्यमंत्री यांच्या स्तरावर प्रस्ताव सादर करण्याचा निर्णय घेण्यात आला. तसेच संबंधित वित्तीय संस्थांच्या प्रमुखांसोबत तातडीने बैठक घेऊन जिल्हा मध्यवर्ती सहकारी बँकांच्या अडचणी आणि शेतकऱ्यांच्या पीक कर्जवाटपाबाबत आवश्यक निर्णय घेण्याचे ठरविण्यात आले.
बैठकीस सहसचिव संतोष पाटील, महाराष्ट्र स्टेट को-ऑपरेटिव्ह बँक लिमिटेडचे प्रशासक विद्याधर अनास्कर तसेच संबंधित अधिकारी उपस्थित होते.
0000
मोहिनी राणे/स.सं.
WhatsApp