कुत्र्याची शिकार करण्यासाठी पाठलाग करणारा बिबट्या एका घरासमोरील शौचालयात तब्बल दोन तास अडकला. रत्नागिरीतील देवळे गावात हा अजब-गजब प्रकार घडला. तब्बल दोन तास कुत्रा आणि बिबट्या या शौचालयात बंद होते.
संगमेश्वरमधील देवळे गावातील रहिवासी तुकाराम कांबळे यांचे घर जंगलाजवळच आहे. बुधवारी पहाटे पाचच्या सुमारास त्यांनी पाळीव कुत्र्याच्या भुंकण्याचा आवाज ऐकला. काय झालं हे पाहण्यासाठी ते घराबाहेर आले. त्यावेळी बिबट्या कुत्र्याचा पाठलाग करत असल्याचे त्यांनी पाहिलं. जीव वाचवण्यासाठी कुत्रा त्यांच्या घराबाहेरील शौचालयात घुसला. बिबट्याही त्याचा पाठलाग करता-करता शौचालयात घुसला. ‘मी सुरुवातीला घाबरलो. धावत जाऊन शौचालयाच्या दाराची कडी बाहेरून लावून घेतली,’ असं तुकाराम कांबळे यांनी सांगितले.
शौचालयात बिबट्या अडकल्याची बातमी गावात वाऱ्यासारखी पसरली. त्यानंतर ग्रामस्थांनी कांबळे यांच्या घराबाहेर गर्दी केली. वनविभागाला माहिती दिल्यानंतर अधिकारी साधारण सात वाजताच्या सुमारास तेथे पोहोचले. ‘शौचालयाच्या दारासमोर पिंजरा लावला. खूप प्रयत्न केल्यानंतर अखेर बिबट्याला जेरबंद करण्यात यश आले. त्याला वैद्यकीय तपासणीसाठी नेण्यात आले. तंदुरुस्त असेल तर त्याला जंगलात सोडण्यात येईल,’ असं वन अधिकाऱ्यांनी सांगितलं.