मंत्री दादाजी भुसे यांचा गाळणे ग्रामस्थांशी संवाद – महासंवाद

-आध्यात्मिकता, सामाजिक बांधिलकी आणि ग्रामविकास यांचा सुंदर संगम घडविणारी ठरली दिवाळी भेट

मालेगाव, दि. ९ नोव्हेंबर (उमाका वृत्तसेवा) : दिवाळीच्या मंगलपर्वात माणसांच्या भेटीगाठींना, आपुलकीच्या संवादाला आणि स्नेहबंधांच्या जपणुकीला विशेष महत्त्व असते. दिव्यांच्या रोषणाईने घराघरांत उजेड पसरत असताना माणुसकीच्या नात्यांमधील जिव्हाळाही अधिक उजळत असतो. याच स्नेहभावनेचा प्रत्यय मालेगाव तालुक्यातील गाळणे गावात आज आला. शालेय शिक्षण मंत्री दादाजी भुसे यांनी दिवाळीनिमित्त गावाला भेट देत ग्रामस्थांसमवेत आनंदाचे क्षण व्यतीत केले. श्री गुरु गोरक्षनाथ शिवपंचायतन मंदिरातील आध्यात्मिक प्रवचनास उपस्थिती, ग्रामस्थांशी मनमोकळा संवाद आणि स्नेहभोजन अशा विविध माध्यमांतून त्यांनी गावकऱ्यांशी आपुलकीचा संवाद साधला. यावेळी गावाच्या सर्वांगीण विकासाच्या वाटचालीबाबतही चर्चा करण्यात आली.

*पाणी आणि वाणी कमी वापरा*

गाळणे येथील श्री गुरु गोरक्षनाथ शिवपंचायतन मंदिराच्या सभागृहात आयोजित कार्यक्रमात श्रावण महाराज कुकाणेकर यांचे प्रवचन झाले. मानवता, अहिंसा, संस्कार, शिक्षण आणि निसर्गसंवर्धन या जीवनमूल्यांची महती त्यांनी आपल्या ओघवत्या विचारांतून विशद केली. माणसाने माणसाशी माणुसकीने वागावे, निसर्गाचे संवर्धन करावे आणि पुढील पिढीला संस्कारांची समृद्ध शिदोरी द्यावी, असा संदेश त्यांनी दिला.

दुष्काळसदृश परिस्थितीच्या पार्श्वभूमीवर पाण्याचे महत्त्व अधोरेखित करत ‘पाणी आणि वाणी कमी वापरा’ हा मोलाचा संदेशही त्यांनी दिला. पाण्याचा प्रत्येक थेंब जपण्याबरोबरच शब्दांचा वापरही संयमाने करण्याची शिकवण देणारे हे विचार उपस्थितांसाठी चिंतनाचा विषय ठरले.

शालेय शिक्षण मंत्री श्री. भुसे यांनी ग्रामस्थांसमवेत प्रवचनाचे श्रवण केले. यावेळी महंत डॉ. योगी विलास नाथ, सरपंच बापू बिचकुले, ग्रामसेवक अशोक शेवाळे यांच्यासह गाळणे गावातील ग्रामस्थ मोठ्या संख्येने उपस्थित होते.

आध्यात्मिक विचारांच्या या मंगल वातावरणानंतर मंत्री श्री. भुसे यांनी ग्रामस्थांशी गावाच्या विकासाबाबत संवाद साधला. गावाच्या गरजा, स्थानिक प्रश्न, पायाभूत सुविधांची आवश्यकता आणि प्रस्तावित विकास कामांच्या नियोजनाविषयी त्यांनी माहिती जाणून घेतली. सिंहस्थ कुंभमेळ्याच्या पार्श्वभूमीवर परिसराच्या विकासाला चालना देण्यासाठी आवश्यक असलेल्या नियोजनाबाबतही चर्चा झाली. ग्रामस्थांच्या अपेक्षा जाणून घेत स्थानिक गरजांनुसार विकासकामांची दिशा ठरविण्याच्या दृष्टीने हा संवाद महत्त्वपूर्ण ठरला.

या भेटीतील स्नेहाचा आणखी एक सुंदर क्षण म्हणजे ग्रामस्थांसमवेत झालेले स्नेहभोजन! मंदिर परिसरात सर्वांसोबत भोजनाचा आस्वाद घेताना मंत्री श्री. भुसे यांनी ग्रामस्थांशी मनमोकळ्या गप्पा मारल्या. सणाच्या निमित्ताने एकत्र आलेली माणसे, परस्परांतील जिव्हाळा आणि सामूहिक आनंदाची अनुभूती यामुळे मंदिर परिसरात आपुलकीचे वातावरण निर्माण झाले. गावाची सांस्कृतिक परंपरा, सामाजिक एकोपा आणि पाहुणचाराची भावना या निमित्ताने अनुभवायला मिळाली.

*आध्यात्मिकता, सामाजिक बांधिलकी आणि ग्रामविकास यांचा सुंदर संगम घडविणारी ही दिवाळी भेट*

दिवाळीचा प्रकाश केवळ पणत्यांमधूनच नव्हे, तर माणसांच्या मनातील आपुलकीतूनही उजळत असतो. गाळणे येथील या भेटीत प्रवचनातून जीवनमूल्यांचा संदेश, ग्रामस्थांशी संवादातून विकासाचा ध्यास आणि स्नेहभोजनातून नात्यांमधील जिव्हाळा अनुभवायला मिळाला. आध्यात्मिकता, सामाजिक बांधिलकी आणि ग्रामविकास यांचा सुंदर संगम घडविणारी ही दिवाळी भेट ग्रामस्थांच्या स्मरणात राहणारी ठरली.

0000000