संयुक्त राष्ट्र: भारतातील करोनारुग्णांची वाढती स्थिती पाहता संयुक्त राष्ट्रांनी मदतीचा हात पुढे केला आहे. त्यानुसार युनिसेफच्या माध्यमातून भारताला विविध आवश्यक सुविधा देण्यात आल्या असून यात तीन हजार ऑक्सिजन कॉन्सन्ट्रेटर्सचाही समावेश आहे. संयुक्त राष्ट्रांच्या प्रमुखांचे उपप्रवक्ता फरहान हक यांनी शुक्रवारी ही माहिती दिली.

भारतातील करोना संसर्गाच्या उद्रेकाच्या पार्श्वभूमीवर आम्ही त्यांच्या पाठिशी उभे आहोत, असे ट्वीट संयुक्त राष्ट्रांचे सरचिटणीस अँतोनिओ गुटेरस यांनी केले होते. या ट्वीटचा उल्लेख करत हक यांनी ही माहिती दिली. आरोग्य चाचण्यांसाठी आवश्यक उपकरणे, ८५ आरटी-पीसीआर यंत्रे, अन्य आवश्यक वैद्यकीय वस्तू व तीन हजार ऑक्सिजन कॉन्सन्ट्रेटर्स आम्ही भारतात धाडले आहेत, असे त्यांनी सांगितले. याशिवाय महाराष्ट्र व ईशान्य भारतात ऑक्सिजननिर्मितीचे २५ प्रकल्प सुरू करण्यासाठी युनिसेफ सहकार्य करत आहे. तसेच, भारताच्या प्रत्येक बंदरावर थर्मल स्कॅनरची उभारणी केली जात आहे, अशी माहिती हक यांनी दिली.

वाचा:करोनाचा धसका: भारतातून येणाऱ्यांना अमेरिका आणि ऑस्ट्रेलियाची प्रवेश बंदी

वॉलमार्टचा पुढाकार

वैद्यकीय ऑक्सिजनची निर्मिती करणारे २० प्रकल्प तसेच, २० क्रायोजेनिक कंटेनर वॉलमार्टकडून भारताला मिळणार आहेत. याशिवाय करोनावरील उपाययोजनांसाठी वॉलमार्ट खासगी संस्थांना २० लाख अमेरिकी डॉलरचे अर्थसाह्यही करणार आहे. वैद्यकीय ऑक्सिजनची कमतरता लक्षात घेऊन वॉलमार्टकडून पहिल्या टप्प्यात तीन हजार ऑक्सिजन कॉन्सन्ट्रेटर्स भारतात पाठवले जाणार असून भविष्यासाठी २५०० ऑक्सिजन कॉन्सन्ट्रेटर्सची तरतूद करण्यात येणार आहे, अशी माहिती वॉलमार्ट फाउंडेशनने दिली.

वाचा: करोनाचा हाहा:कार: भारत-नेपाळ सीमेवरील २२ ठिकाणी एन्ट्री पॉईंट बंद

मास्टरकार्डकडून फिरते बेड

आघाडीची आंतरराष्ट्रीय पेमेंट कंपनी मास्टरकार्डने भारताला दोन हजार फिरत्या खाटा देऊ केल्या आहेत. अमेरिकन इंडिया फाउंडेशनच्या माध्यमातून ही मदत केली जाणार असून यासाठी मास्टरकार्डने या फाउंडेशनला ८९ लाख अमेरिकी डॉलरचे अर्थसाह्य केले आहे. या खाटा व्हेंटिलेटरसह सर्व आवश्यक सुविधांनी युक्त असतील, असे मास्टरकार्डने म्हटले आहे.

वाचा: करोनाच्या संसर्गाने पत्रकारांचा मृत्यू; जगात भारत तिसऱ्या स्थानी

बोइंगकडून एक कोटी डॉलर

बोइंग या विमानसेवा क्षेत्रातील आघाडीच्या कंपनीने भारताला १ कोटी अमेरिकी डॉलरचे तातडीचे अर्थसाह्य घोषित केले आहे. करोनाप्रश्नी भारतात कार्यरत असणाऱ्या संस्थांना हे साह्य केले जाणार आहे. करोना महामारीने जगभरातील सर्व देशांना उद्ध्वस्त केले आहे. भारतीय नागरिकही सध्या बिकट स्थितीतून जात आहेत. त्यांच्याविषयी आम्हाला सहानुभूती वाटत असून त्या दृष्टीने ही मदत करण्यात येईल, असे या कंपनीच्या प्रसिद्धीपत्रकात म्हटले आहे.