Viral News आश्चर्यच ! महिलेने एकाच वेळी ९ बाळांना जन्म दिला

माली: जगातील अतिशय दुर्मिळ घटना समोर आली आहे. मोरक्कोमध्ये एका महिलेने ९ अपत्यांना जन्म दिला आहे. ही महिला मूळची माली देशाची नागरिक आहे. माली सरकारने याबाबतचे एक वक्तव्य जारी केले असून प्रसुती झालेली महिला आणि अपत्ये यांची प्रकृती चांगली आहे. मात्र, मोरक्को प्रशासनाने याची अद्याप पुष्टी केली नाही. याआधी माली सरकारने २५ वर्षीय हलीमा सिस्से हिला चांगल्या उपचारासाठी ३० मार्च मोरक्कोला पाठवले होते.

या महिलेच्या गर्भात सात भ्रूण असल्याचे सांगण्यात आले होते. मात्र, तिने ९ अपत्यांना जन्म दिला. मोरक्कोच्या आरोग्य मंत्रालयाचे प्रवक्ते राचिड कोउधारी यांनी सांगितले की, देशातील कोणत्याही रुग्णालयात अशा प्रकारची प्रसुती झाल्याची माहिती अद्याप आमच्यापर्यंत आली नाही.

वाचा: …तर भारतात तीन महिन्यात करोना बळींची संख्या १० लाखांवर!

तर, मालीच्या आरोग्य मंत्रालयाने याबाबत अधिक माहिती दिली आहे. त्यांनी दिलेल्या माहितीनुसार हलीमाने पाच मुली आणि चार मुलांना जन्म दिला आहे. सिजेरियन द्वारे तिची प्रसुती झाली. देशाच्या आरोग्य मंत्री फांता सिबी यांनी सांगितले की, आई आणि नवजात बालके पूर्णपणे सुखरूप असून त्यांची प्रकृती चांगली आहे. हलीमासोबत मालीतील एक डॉक्टरदेखील असून त्यांच्याकडून सर्व माहिती उपलब्ध होत आहे. हलीमा आपल्या नवजात बालकांसह येत्या काही दिवसात मालीमध्ये परतणार आहेत.

वाचा: करोनाच्या ब्राझील, ब्रिटीश आणि भारतीय वेरिएंटवर ‘ही’ लस प्रभावी!

वाचा: करोनावर मात केलेल्यांना लशीचा एकच डोस पुरेसा? संशोधनात नवा खुलासा

दरम्यान, स्थानिक माध्यमांनी दिलेल्या वृत्तानुसार, हलीमाच्या प्रकृतीबाबत डॉक्टरांनी चिंता व्यक्त केली आहे. मालीच्या आरोग्य मंत्रालयाने सांगितले की, दोन्ही देशांमध्ये करण्यात आलेल्या अल्ट्रासाउंड चाचणीमध्ये हलीमाच्या गर्भात सात भ्रूण असल्याचे समजले. मात्र, प्रसुतीच्या वेळी तिने ९ शिशुंना जन्म दिला. मालीच्या आरोग्य मंत्र्यांनी माली आणि मोरक्कोच्या वैद्यकीय टीमचे अभिनंदन केले आहे.