ज्येष्ठ अभिनेते नाना पाटेकर यांच्या निधनाने जिवलग मित्र आणि मार्गदर्शक गमावला – मंत्री डॉ. उदय सामंत – महासंवाद

मुंबई, दि. ८ : ज्येष्ठ अभिनेते, संवेदनशील माणूस, स्पष्टवक्ते व्यक्तिमत्त्व आणि सामाजिक बांधिलकी जपणारे माझे जिवलग मित्र नाना पाटेकर यांच्या निधनाची बातमी मनाला सुन्न करणारी आहे. नानांसोबतचे माझे संबंध केवळ परिचयापुरते किंवा सार्वजनिक जीवनापुरते मर्यादित नव्हते. आमच्यात जिव्हाळ्याचे आणि मनापासूनचे मैत्रीचे नाते होते. माझ्यावर प्रेमाने रागावणारा, चिडणारा एक आपला माणूस आज आपल्यातून निघून गेला, या भावनेने मनाला चटका लागला आहे, अशा शब्दांत उद्योगमंत्री डॉ. उदय सामंत यांनी ज्येष्ठ अभिनेते नाना पाटेकर यांना श्रद्धांजली वाहिली.

ज्येष्ठ अभिनेते नाना पाटेकर यांच्यासोबत झालेल्या अनेक संवादांच्या आठवणी जाग्या होत आहेत. त्यांचा परखडपणा, माणसांकडे पाहण्याचा संवेदनशील दृष्टिकोन आणि एखादी गोष्ट मनापासून पटली की त्यासाठी ठामपणे उभे राहण्याची त्यांची वृत्ती कायम स्मरणात राहील, असे डॉ. सामंत यांनी सांगितले.

अभिनयाच्या क्षेत्रात नाना पाटेकर यांनी स्वतःची वेगळी ओळख निर्माण केली. मराठी आणि हिंदी चित्रपटसृष्टीतील असंख्य भूमिका त्यांनी आपल्या अभिनयाच्या ताकदीने अजरामर केल्या. त्यांचा आवाज, संवादफेक, डोळ्यांतून भावना व्यक्त करण्याची शैली आणि व्यक्तिरेखेत पूर्णपणे सामावून जाण्याची त्यांची क्षमता पुढील अनेक पिढ्यांसाठी प्रेरणादायी राहील. मात्र, पडद्यावरच्या नानांपेक्षा माणूस म्हणून भेटलेला नाना माझ्यासाठी अधिक मोठा होता, असेही डॉ. सामंत यांनी नमूद केले आहे.

सामाजिक बांधिलकी जपणारा संवेदनशील मित्र जेष्ठ अभिनेते नाना पाटेकर यांनी ‘नाम फाउंडेशन’च्या माध्यमातून महाराष्ट्रातील शेतकरी, दुष्काळग्रस्त भाग आणि जलसंधारणाच्या क्षेत्रात केलेले कार्य त्यांच्या सामाजिक जाणिवेची साक्ष देणारे आहे. कोकणच्या मातीशी नानांचे विशेष नाते होते. ‘नाम फाउंडेशन’च्या माध्यमातून कोकणात झालेल्या विविध सामाजिक आणि जलसंधारणाच्या कामांशी त्यांचा असलेला जिव्हाळा आपण जवळून अनुभवला असल्याचे डॉ. सामंत यांनी सांगितले. या कामाच्या निमित्ताने नानांसोबत अनेकदा संवाद साधण्याची संधी मिळाली. त्यामुळे आमच्यातील मैत्रीचे नाते अधिक घट्ट झाले. समाजासाठी काहीतरी करण्याची त्यांची तळमळ आणि त्यामागची प्रामाणिक भावना नेहमीच प्रेरणादायी होती. २०२५ मध्ये ‘नाम फाउंडेशन’च्या दशकपूर्ती सोहळ्यातही नानांसोबत एकत्र येण्याचा प्रसंग आला होता. त्या वेळी त्यांच्या सामाजिक कार्याची व्यापकता आणि महाराष्ट्रासाठी काहीतरी करण्याची त्यांची धडपड प्रकर्षाने जाणवली, असे मंत्री डॉ. सामंत यांनी श्रद्धांजलीपर संदेशात म्हटले आहे.

००००